20,000 Ka kabus nakabenepisyo sa champ sa Cebu City hall

CEBU, Philippines - Dul-an sa 20,000 ka kabus dinhi sa dakbayan ang nakapahimulos sa City Hospitalization Assistance and Medical Program (CHAMP) gikan sa kagamhanan sa dakbayan sa Sugbo.

Si Henry Sanchez nga maoy executive director sa CHAMP miingon nga 11,569 ka tawo ang natabangan nila paghatag og mga tambal nga ilang gikinahanglan.

Ang 6,977 mga nagpuyo sa south district samtang ang 4,592 lumulopyo usab sa north district. Miabot og P19.1 milyones ang gasto sa paghatag og tambal sa maong mga nanginahanglan.

Sa tambal, tag P5,000 ra ang mahatag sa CHAMP sa matag tawo, samtang kadtong ma-admit sa ospital P25,000.

Matud ni Sanchez nga gawas sa nahatagan nila’g tambal, laing 4,360 ka tawo ang natabangan nila kay na-admit sa ospital ug gigastohan  sa dakbayan og P39 milyones.

Sa laboratory examination sa mga pasyente, 4,957 usab ka tawo ang natabangan og P22.7 milyones ang nagasto sa CHAMP. Gitataw hinoon ni Sanchez nga wala mahurot ang P100 ka milyon nga gitagana sa CHAMP sa miaging tuig apan karong tuiga gihimo pa gani nga P120 milyones.

Matud ni Sanchez nga kadtong gusto nga matabangan sa CHAMP kinahanglang mopakita lang og Comelec certificate nga siya botante o anak og botante sa dakbayan, certification sa barangay, ug dukomento sa ospital o kaha doktor, apil ang resita sa tambal. (/EIM) (BANAT NEWS)