Pundo alang sa Buhing Kalbaryo wala pa gihapon ma-release

CEBU, Philippines - Katorse ka adlaw na lang ug Biyernes Santo na karong Marso 29, apan ang gitinguha nga pagasto og P475,000 alang sa pagpahigayon og Buhing Kalbaryo wala pa gihapon maaprobahi sa Konseho.

Atol sa sesyon sa Konseho sa dakbayan niadtong Miyerkules, wala dayon maaprobahi ang gisugyot nga kantidad nga adto ibanon sa gitawag og Pagcor Funds.

Nahibaw-an nga matag buwan, ang Philippine Amusement and Gaming Corporation (Pagcor) mohatag og tulo ka milyon ka pesos ngadto sa dakbayan isip bahin niini sa kita sa Pagcor pag-operate og gambling Casino dinhi sa siyudad.

Adunay lagda ang Pagcor kun unsay gastohan sa kwarta nga ihatag nila sa dakbayan sa Sugbo ug matud ni Konsehal Margarita “Margot” Osmeña nga ang pagasto alang sa relihiyoso nga kalihukan wala malakip sa Pagcor guidelines.

Kini maoy rason nga si Osmeña mihimo og committee report sa resolusyon ni Konsehal Roberto Cabarrubias nga kuhaan usa nila og opinyon ang City Accountant nga si Diwa Cuevas.

Matud ni Osmeña nga kun ang city accountant moingon nga mahimo ra nga gamiton ang Pagcor funds alang sa Buhing Kalbaryo, ang konseho andam nga moaprobar dayon sa maong budget. Si Mayor Michael Rama miingon nga naandan na nga ang dakbayan mogasto matag Buhing Kalbaryo ug ang gasto anha nila kuhaa sa Pagcor funds.

Ang Buhing Kalbaryo salmotan sa mga 200 ka batan-on nga mohulagway sa mga pagpasakit ni Jesukristo gikan nga siya gidakop sa mga Hudeyo hangtud nga siya gilansang sa balabag. (EIM) (BANAT NEWS)