Anti-Drug Operations usa patay

CEBU, Philippines - Usa patay ug pito ang arestado sa gipahigayong buy-bust operation sa mga sakop sa Provincial Intelligence Branch (PIB) kagahapon sa hapon sa Sitio Molave, Barangay Tayud, lungsod sa Liloan.

Ang napusilan giila lang sa ngalan nga Richard kinsa gideklarar nga dead on arrival sa Eversley Child Sanitarium sa Barangay Jagobiao, Mandaue City tungod sa pinusilan sa lawas human kini misuway sa pagsukol sa mga polis.

Ang operatiba dili pa makahatag sa ngalan sa nasikop kay wala pa ma-inventory ang mga ebidensiya.

Nakuha sa operatiba ang daghang pakete sa mga shabu nga mokabat sa P500,000, nagkadaiyang armas, timbangan, drug paraphernalia, daghang bala, magazines, bullet vest ug ledger notebook nga adunay kolektahunon nga P1.7 million gikan sa apartment ni Bebot Pepito, subject sa operasyon.

Ang klase sa armas nga na-recover naglangkob sa Ingram submachine pistol; KG9 sub-machine pistol; .45 pistols; .357 revolvers;  .22 magnum ug 9mm revolvers.

Apan pakyas ang operatiba sa pagsikop kang Pepito ug sa asawa niini nga gihinganlan og “Isyat” human kini makaikyas sa wala pa ang transaksyon.

Matud ni SPO1 Reynaldo Solante, nga si Pepito gyud unta ang ilang target nga mapalitan og ‘shabu’ gamit ang P15,000 nga marked money bugti sa tulo ka gramong shabu mga alas 3:00 sa hapon.

Apan matud pa adunay mitawag sa cellphone ni Pepito maong gipasa niya ang transaksyon ngadto sa iyang sakop ug mibiya sa balay. “Siya unta ‘to unya murag dunay nitawag gipasa among poseur buyer unya gidala sa sulod (apartment),” matud ni Solante sa phone interview.

Nakita sa operatiba sulod sa apartment ang mga armas lakip na ang tulo ka babaye ug upat ka lalaki nga nag-repack sa shabu.  Dinhi migawas ang sakyanan ni Pepito uban ang asawa niini.

“Wa mi kabantay nga mao na diay ‘tong sakyanan nga nigawas unya mao pay pag-signal sa poseur buyer namo kay nalangay kay nagtimbang pa,” matud ni Solante.

Si Supt. Rodolfo Albotra, PIB chief, nagkanayon nga si Richard daling nakabunot sa usa ka hand grenade dihang nakabantay nga pulis ang ilang kustomer apan naunhan kini sa operatiba.

“No choice ang tropa kaysa sila ang maunhan,” sigon pa ni Albotra. Si Albotra midugang nga paingon na i-deliver ang mga shabu sa nagkadaiyang lungsod sa amihanang bahin sa Sugbo.

“Ang mga tawo ani ini’g hatod na sa drugas posible gyud padad-an og armas,” dugang pa ni Albotra tungod sa mga armas nga nakuha diha sa balay.

Si Pepito anaa sa watchlist sa PIB ug level two nga drug pusher. Ang mga nasikop giingong itanggong kini sa nagkadaiyang karsel sa kalungsoran samtang gihikay ang mga kaso batok kanila. (BANAT NEWS)