Sunog sa Tabogon 1 patay

CEBU, Philippines - Usa ka 31 anyos nga giingong   adunay   deperensya  sa pangisip  napaig   human  masunog  ang  ilang  balay   sa bukirang bahin sa Barangay Daantabogon, lungsod sa Tabogon kagahapon  sa buntag.

Nakaeskapo pa unta si Flordeliza Guinuo, 31, kung wala  kini sirad-i   sa iyang ginikanan   sulod  sa ilang balay.

Sila si Felixberto Guinuo, 59 ug Teodora Guinuo, 57,   ang  mga  ginikanan  sa biktima giingong nagbantay sa tindahan  duol sa Daantabogon Elementary School,  adunay 300 metros nga gilay-on  sa ilang  balay dihang nasunog  kini  mga   alas 9:58 sa buntag.

Ang silingan sa biktima giingong nakadungog og buto gikan sa balay sa wala pa moulbo ang kayo  nga  gumikan  sa gaan  nga  mga dapat  dali ra kaayong  naugdaw.

Nadunggan pa sa mga silingan si Flordeliza nga nagpakitabang apan napakyas ang mga silingan sa pagluwas kaniya tungod sa kainit na sa kayo.

Ang Tabogon fire volunteers ug  ang Bogo Fire Station miabot apan ugdaw na ang  biktima   uban  sa ilang  balay.

Nakaplagan na lang sa kabomberohan ang lawas sa biktima sa lawak niini  nga  napaig  na. 

 Matud ni FO1 Archie Estrella sa Bogo Fire Station, nga naglisod sila sa pagsaka sa lugar tungod sa katungason niini samtang kinahanglan pa nila sumpayon ang  walo ka hose aron makaabot sa balay tungod sa kahagip-ot sa lugar.

Si Estrella midugang nga misuway sa pagawas ang biktima apan kay lock ang pultahan sa balay napaig kini sa sulod.             Padayon pang giimbestigar ang hinungdan sa sunog  kansang  danyos  gibana-bana nga mokabat sa P10,000.            

Gi-imbestigar usab sa kapolisan kung aduna bay tulubagon ang ginikanan sa biktima.  (BANAT NEWS)