Magtutudlo gidid-an pagpagamit sa politiko

CEBU, Philippines - Gipahimangnoan ni 4th District Cong. Benhur Salimbangon ang mga magtutudlo sa ika-upat nga distrito nga dili magpagamit sa mga politiko sa pagsilbi unya niini sa umaabot nga piniliay sa Mayo 13, 2013. Si Salimbangon mihimo  sa maong  awhag human siya makadawat og report nga may mga politiko nga  buot nga empluwensiya  ang mga magtutudlo aron kini makabintaha sa ilang boto nga maangkon.

Iyang gitataw nga angayan gyud nga hunahunaon sa mga magtutudlo ang ilang profession ug ang ilang trabaho pinaagi sa pagtutok lamang sa ilang panginabuhi ug dili magpadala sa mga binuang sa mga politiko. Wala hinuon hinganli  ni Salimbangon ang giingon  niyang  mga politiko nga naglaraw sa pag-empluwensiya sa mga magtutudlo sa iyang distrito. Kahinumdoman nga sa unang higayon nga gigamit ang Precinct Count Optical Scan machines (PCOS) sa milabay’ng piniliay daghan ang mga nagbagutbot nga mga botante kay gilangay-langay  kuno  sila sa mga magtutudlo sa pagbotar hinungdan nga namauli na lang ang ubang mga botante ug wala na ka botar.

Samtang si ANAD partylist Representative Pastor Jun Alcover mihulagway nga dili ordinaryo ug dili basta-basta ang umaabot nga election niining tuiga  kay daghan ang mga sakop sa komunista nga nag- takoban lang ubos sa administrasyong Aquino ug gani daghan na sa maong grupo ang naghupot na og katungdanan sa goberno.

Gisaway usab ni Alcover ang pagkatudlo ni Grace Padaca isip usa sa mga komisyonado  sa Commission on Election (COMELEC) kay kini ilado na man usab  nga  sakop sa walhon kaniadto. (BANAT NEWS)