LTFRB milaum disgrasya sa kadalanan mokibra

CEBU, Philippines - Mapasalamaton  si  Regional Director Ahmed Cuizon  sa Land Transportation Franchising  and Regulatory  Board (LTFRB)7  kagahapon sa  kagamhanan  sa lalawigan  sa  Sugbo sa  pagtibhang  niini  og 25 porsento sa terminal  fee   sa  mga  bus  pasaheroan  nga  mo-parking  sa Cebu South Bus Terminal (CSBT) uban  sa paglaum  nga  matibhangan  usab  ang  mga  disgrasya  sa kadalanan.

Si  Cuizon  mipalanog  sa  iyang  pasalamat  atol  sa binuwan  nga  tigom  sa  Cebu Provincial  Bus Operators Association (CPBOA)  nga  gipahigayon  didto  sa Sacred Heart Center  sa dalan  Jakosalem  ning  dakbayan  sa Sugbo  kagahapon  sa udto.

Matud  pa ni Cuizon  nga  naglaum  siya  nga  pinaagi  sa  pagtibhang  sa  bayranan  sa  terminal  fee, momenus  na  usab  ang  disgrasya  sa  mga sakyanang  pasaheroan.

Kini  tungod  kay  matud pa  niya  usa  sa hinungdan  sa daghan kaayong  disgrasya  sa mga  sakyanan  sa kadalanan  mao  ang  paningkamot  og  kinaskasay  sa  mga  drayber  sa pagpadagan og  kusog  sa  ilang  mga  sakyanan aron  nga  makabawi   sa ilang  bayranan  sa terminal  fee  busa  mag-inilogay  kini  sa mga pasahero  sa kadalanan.

Ang  pasalamat  ni Cuizon  maoy  segunda  sa unang  pagpalanog  ni Julie Flores, Presidente sa CPBOA sa iyang  pasalamat  kang  acting  Governor  Agnes  Magpale  kinsa  mitagad  sa ilang  hangyo  sa pagpakubos  sa terminal  fee ngadto  sa P150 gikan  sa P200.

Matud  pa  ni  Flores  nga  gibati  sila  og  kahiubos  kang  suspendido  gobernador  Gwendolyn Garcia  kinsa wa gyud  mohatag  pagtagad  sa ilang  hangyo  niadtong  wala  pa  kini  masuspenso.

Si Magpale  kinsa  mitambong  usab  sa maong  tigom mipasalig  nga kun  tan-awon  niya  nga may  maayong  higayon  ang  koleksyon  sa terminal, way katarungan  nga  dili  niya  itugot  ang  gipangayo  sa mga  bus operator  nga 50 porsento  nga tibhang    sa terminal  fee.

Miingon  si Magpale  nga  gikan  sa 50 porsento  nga  maoy  gipangayo  sa  mga  operator,  25 porsento  lang una  ang  iyang  gitugot dihang  nakita  niya  nga  may  gamay  nga  ginansya  ang  terminal  gikan  niining  maong  bayranan.

Gibutyag  ni  Magpale  nga  di kinahanglang  ginansya  maoy  pasulabihon  apan  ang  maayong  serbisyo  nga  makatagbaw  sa mga pasahero  ug  sa publiko  maoy  labing  gikinahanglan

Gipasalig  usab  ni  Magpale  nga  gawas  sa maong  tibhang,  pauswagon  ang  serbisyo  sa terminal  sama  sa pagdugang  og  security guard , mga utility nga trabahante  sa pag-atiman  sa kahinlo  sa pansayan ug  sa tibuok palibot  sa CSBT. (BANAT NEWS)