P10 bilyones pundo alang sa classroom aprobado na

CEBU, Philippines - Aprobado  na sa Department of Budget and Management (DBM) ang pagpagawas sa P10 bilyones nga budget alang sa pagpanukod  og mga lawak-tunghaan.

Matud pa ni Regional Director Recarido Borgonia  nga segurado  nga  may  pahat  usab niini  ang  Department of Education (DepEd) dinhi sa Central Visayas. Si Budget Secretary Florencio Abad nagkanayon, nga kining maong  kalamboan  maoy  pagtuman  sa mando ni  Presidente Benigno Aquino III aron masulbad  ang  suliran  bahin  sa kakuwang  sa mga  classroom sa  mga  tulunghaan  sa nagkalainlaing  rehiyon  sa nasud. Sa maong kantidad, igahin ang P1.7 bilyones niini alang  sa itarok  nga  mga  lawak  klasehanan sa National Capital Region, P1.2 bilyones sa Rehiyon IV-A, kapin sa P800 milyones sa Rehiyon 8 ug P600 milyones alang sa Autonomous Region in Muslim Mindanao.

Ang nahabiling pundo, igahin sa  mga  tukoronong  lawak  klasehanan  sa Kabisay-an ug  uban  pang  dapit  sa Mindanao.Hinuon  gipaabot  pa  nga  kompletohon  sa DepEd  ang  pagtunol sa listahan  niini  alang  sa  mga  rehiyon  nga  nagkinahanglan  og  dugang  lawak  klasehanan.

Sa  maong pundo lakip  usab  nga  gahinan  niini  ang Basic Education Facilities sa DepEd ubos sa 2013 General Appropriations Act. (BANAT NEWS)