Mipabuto’g armas priso

CEBU, Philippines - Gisikop sa kapolisan ang usa ka lalaki nga  nagdala og armas  ug  mipabuto  pa niini didto sa sitio Santa Lucia, barangay Poblacion, lungsod  sa Consolacion sa miaging  gabii

Ang nadakpan mao si Joseph Pacquiao,  35, ulitawo nga taga barangay Tulo-Tulo, sa nahisgotang lungsod.  

Ang nailog  kaniya  mao  ang  .38  kalibre  nga  revolver  nga  may upat ka mga buhing bala.

Matud pa ni PO2 Johnaskie Romero sa kapolisan  sa maong  lungsod  nga gipakita ni Pacqiuao  ang gidala niining armas ngadto sa mga higala niini sa maong dapit ug  ang mga tawo nga  nakakita  niini  dali nga nanawag sa Consolacion Police Station.

Si PO3  Arthur Oreate sa Consolacion Police Station  gikuyogan sa ilang Barangay Intelligence Network  (BIN) nga si Gerardo  Ramirez   sa  pagtubag  sa maong alarma.   

 Pag-abot  nila  sa maong   lugar  ang  mga  molupyo  nga  nagpakabana  maoy  misugat  kanila ug  mihatag  og  giya sa  hitsura  sa suspetsado. 

Giduol nila ni PO3 Oreate si Pacquiao ug   dihang girikisa  kini ilang  nasuta  ang  giluklok  nga  armas  de fuego  niini  busa  ila  dayong  gisakmit.

Gipangayoan pa kini nila ni PO3 Oreate og mga dokumento   sama  sa lisensiya sa armas, permit to carry firearms, ug uban pa, apan napakyas kini sa pagpakita  hinungdan  nga  gibalhug  dayon  nila  sa prisohan.

Ang  paglapas  sa  Comelec gun ban maoy nag-una nga kaso nga ilang gipasaka batok sa maong suspetsado  ug  idugang  nila  ang  illegal nga pagpaboto niini. (/WC) (BANAT NEWS)