Duha gipamusil sa bag-ong gikaila, usa patay
CEBU, Philippines - Usa ang namatay ug laing usa ang naangol sa nahitabong pagpamusil sa sitio Ibabao, barangay Agus, dakbayan sa Lapulapu.
Ang namatay mao si Jalil Sultan, 21, ug ang naangol mao si Jorrel Candayo, 21, lumad nga taga Marawi City ug kasamtangan nga nagpuyo sa sitio Iba, barangay Basak, dakbayan sa Lapulapu.
Giila lang sa angga nga Totong ang gitumbok nga nagpusil sa duha ka biktima nga giingong bag-ohay lang niining nakaila.
Matud pa ni PO1 Jomar Florentino nga nagsakay og motorsiklo ang suspetsado nga nahidangat sa panimalay sa duha ka biktima kinsa midapit kanila og inom ug mipaangkas kanila sa motor padung sa lugar diin sila mag-inom.
Apan pag-abot sa nahitaboan, gipakanaog sa suspek ang duha og kalit silang gipamusil. Si Sultan naigo sa iyang ulo samtang si Candayo naigo sa bukton ug mikaratel og dagan.
Dali nga gidala sa Lapulapu City Hospital ang duha apan gideklarar nga patay si Sultan. Gisusi pa sa kapolisan ang motibo sa maong pagpamusil. (BANAT NEWS)
- Latest
