Unom ka tawo nadakpan tungod sa paghupot ug armas ug granada

CEBU, Philippines - Unom ka tawo ang nasikop sa managlahi nga lugar sa lungsod sa San Fernando ug dakbayan sa Toledo human kini masakping naghupot og mga armas ug granada.

 Ang mga nasikop mao silang Jhann Louie de Asis, 26, molupyo sa Baliwagan, lungsod sa Balamban;  Abraham Navarro Quimada, 47, giingong usa ka local government employee sa dakbayan sa Toledo ug molupyo sa barangay Bato; Emilio Homecillo; Julius Kierulf; Nelson Deloraso Gantuanco, 51 ug  Joel Lapaz Locsin, 36, taga lungsod sa San Fernando.

Pasado alas-3 kagahapon sa kaadlawon, ang kapolisan sa dakbayan sa Toledo miresponde sa usa ka alarma sa pagpamusil ug ilang naabtan sila si De-Asis ug Quimada hinungdan nga ila kini nga gisita.  Sa pakighinabi sa Banat News sa hepe sa Toledo Police Supt. Henry Binas mibutyag kini nga dihang ilang girekisa ang duha aduna silay tagsa ka kalibre .38 nga adunay lima ka bala ug duha ka hand grenades.  Dugang pa ni Biñas, gawas sa ilang nakuhang armas, ila usab nga narekober ang usa ka silencer sa usa ka KG9 submachine pistol, bonnet, fatigue nga shorts ug jacket.  Una nang nasikop mao silang Homecillo og Kierulf nga nakuhaan usab ug mga armas tungod sa mao gihapong alarma nga gidudahan nilang may kalambigitan sa ilegal nga drugas.

Samtang pasado alas-10 niadtong Biyernes sa gabii, nasikop usab sa kapolisan sa lungsod sa San Fernando sila si Gantuanco ug Locsin human makuhaan og armas ug kutsilyo.Nakuha gikan kanila mao ang usa ka .357 magnum rebolber nga adunay tulo ka bala ug usa ka kutsilyo nga adunay gitas-on nga 10 pulgadas.

Ang duha gireklamo sa  usa ka opisyal sa barangay Bulangag sa maong lungsod tungod sa pagbahis-bahis nga nagdala sa maong mga hinagiban.Ang duha maoy gitumbok nga suspek sa pagpusil patay sa usa ka Jonathan Gantuangco niadtong Miyerkules sa gabii. (BANAT NEWS)