Pangabuso sakit nga kasinatian sa kababayen-an
CEBU, Philippines - Ang pagpangabuso maoy nag-una sa mga kasinatian nga natagamtaman sa kababayen-an gikan sa mga kamot sa mapanamastamasong kalalakihan sa nasud base sa natala nga record sa Department of Social Welfare and Development (DSWD) Region 7.
Si Jaybee Binghay, ang rehiyonal information officer sa DSWD-7, mipahibawo niini sa bag-ong gipahigayong Kapihan sa PIA sa buhatan sa PIA-Cebu.
Matud ni Binghay nga ang mga kababayen-an nga misumbong sa buhatan sa DSWD7 gumikan sa mga kaso ug problema nga nasinatian niini gikan sa madaugdaogong lalaki sama sa bana ug uban pa misaka sa miaging tuig 2012.
Si Binghay midugang nga ang mga babaye nga dagko og problema nga nasinatian mao kadtong nabiktima sa pang-abuso, pagpanagmal, prostitusyon ug human trafficking. Si Binghay midugang nga ang kababayen-an nga gi-abusohan sa lalaki maoy labing daghan og natala sa DSWD nga mikabat sa 241 sa tuig 2011 ug 199 sa milabayng tuig sa 2012.
Sumala pa ni Binghay nga mikunhod og dyutay ang gidaghanon sa gipang-abusohan nga kababayen-an sa miaging tuig 2012 itandi sa tuig 2011.
Ang mga babaye karon kahibalo na asa sila modangop ug mangayo og tabang sa panahon nga silay abusohan kay anaa ang DSWD, mga barangay ug police help desks ug uban pang mga organisasyon, nga ilang duolan.
“Ang babaye nga nabiktima sa mga pangabuso adunay lain-laing kategorya nga naglangkob niadtong gidagmalan, kulatado, gimaltrato, gi-rape, giunay og lugos sa kaliwat, acts of lasciviousness, nailad sa illegal recruitment, supak sa kaugalingon sa prostitusyon ug sa trafficking,†matud pa ni Binghay.
Ang laing kaso sa pag-abuso sa mga kababayen-an mao ang kapakyas nila pagdawat og tabang financial ug uban pang susama niini nga mikabat sa 133 sa tuig 2012 itandi sa 127 lang ka kaso sa tuig 2011.
Sa laing bahin, kadtong gi-abusohang physical, gimaltrato, kulatado nga mga babaye mikunhod sa miaging tuig ngadto sa 188 itandi sa 113 lang sa tuig 2011, sumala ni Binghay. (BANAT NEWS)
- Latest
