Ulitawo giliog pagtigbas sa papa
CEBU, Philippines - Natabas ang liog sa 27-anyos nga ulitawo human kini tigbasa gamit ang sundang sa iyang amahan kay hubog nga mipauli sa ilang balay sa barangay Mandilikit sa lungsod sa Argao niadtong Sabado sa alas 4:00 sa hapon.
Ang biktima mao si Dennis Artiaga, 27, ulitawo ug molupyo sa nahisgutang lugar, samtang ang suspek mao ang iyahang amahan nga si Virgilio Artiaga Jr., 55, minyo, usa ka mag-uuma sa maong lugar.
Si PO2 Alexander Lerio sa Argao Police Station mibutyag sa Banat News nga gikan pa sa iyang uma ang suspek.
Mipahuway kini gumikan sa kakapoy apan kalit lang mitungha ang iyang anak nga hubog kaayo.
Gumikan sa kalasbag niini giingong nagpunay og tagawtaw bahin sa suliran nilang magpamilya nga nakapasuko sa suspek hangtud nga miulbo ang ilang away.
Tungod sa kasuko sa suspek mikuha kini sa iyang sundang dayon giliog pagtigbas ang biktima ug gumikan kay may mga silingan nga miuwang dayon sa amahan ug anak, wala na tiwasa pagputol ang liog sa biktima.
Ang biktima gihatod dayon ngadto sa Isidro Kintanar Memorial Hospital sa lungsod samtang ang suspek mitahan usab dayon sa kapolisan.
Ang kapolisan nagpaabot sa mga kabanay hangtud karong buntag sa kasong ipasaka niini batok sa suspek. (WC)(BANAT NEWS)
- Latest
