Imbitasyon sa gradwasyon di kalikayan – Radaza

CEBU, Philippines - Dili kalikayan   ang  mga tunghaan   nga moimbitar sa mga lokal nga opisyal   aron  mamulong  sa ilang  “Graduation Ceremony” karong buwana  sumala  pa  ni  Mayor  Paz Radaza  sa dakbayan  sa Lapulapu.

  Si Mayor  Radaza  uban  sa anak niini nga si Aileen Radaza  nga modagan pagka- kongresista  sa Lapulapu City  lone   district nagkanayon nga naglinya ang ilang imbitasyon   gikan  sa nagkadaiyang tunghaan sa elementarya, high school ug kolehiyo sa dakbayan sa Lapulapu, alang  sa  kalihokan  nga  may  labot  sa gradwasyon.

  Usa  niini  mao  ang Philippine State College of Aeronautics (PHILSCA) sa Mactan Benito Ebuen Air Base, matud pa  sa mayor.   Gani   si Dr. Nonadel Alvarado Soriano ang PHILSCA Campus Director  sa  PHILSCA  nga  si Aileen Radaza maoy ilang  guest  speaker   sa ilang “Recognition rites” karong  Marso 15, samtang   si Mayor Radaza sa “Graduation Ceremony” usab karong Marso 25 nga ipahigayon  sa Hoopsdome sa Brgy. Gun-ob  sa maong  dakbayan.

Miingon  si  Radaza  nga  daan na siyang mitamod sa lagda sa Comelec   bahin  sa  tugon  niini  nga  dili  angay  mamolitika  ang  mga  kandidato  sa panahon  sa  mga  gradwasyon  sa  mga  eskuylahan. Nanghinaot usab si Radaza nga  sundon kini sa ubang mga kandidato ug maghuwat sa adlaw nga gitugot sa Comelec  ug maglikay nga mamolitika atol sa graduation rites sa mga tinun-an. (Bong Soriano/WC)

Lapulapu may 20 ka common  poster areas

Ni Romeo T. Limpangog

Higpit nga  ipatuman ang buhatan sa Commission on Elections (Comelec)  ang  pagtukod  og  common  poster  area (CPA)  sa dakbayan  sa Lapulapu  nga  kabutangan  sa  mga  kandidato  sa ilang campaign materials.

Si Lapulapu City Election Officer Janette  Lamban  mibutyag  sa mga tigbalita nga kutob  sa  mga  poster, tarpaulin, streamer  ug  uban  pang  materyales  sa  kampanya  sa kandidato  nga  ilang  makita  sa mga  lugar  nga  di CPA ila  kining  tangtangon. Matud pa ni Lamban nga may  20 lamang ka mga dapit sa dakbayan nga napili  nilang  CP nga naglakip sa Marina Mall, Takan-Buaya runway, duol sa Mactan Shrine,   Datag-Maribago Crossing,  ang eskina sa dalan Sacred Heart Church sa barangay Marigondon,  crossing sa Bankal-Pajac  Rotunda.

MEPZ Basak, Crossing Gun-ob ug  Basak, Crossing sa barangay Gun-ob, Looc ug Canjulao, kilid sa  Poblacion basketball court, kilid sa Philippine Savings Bank, duol sa Mactan Mandaue Bridge sa dapit sa Menzi,  sa skywalk nga nahimutang sa atubangan sa  Lapulapu City Hall compound, sitio Toril sa barangay Canjulao, barangay Agus Crossing, eskina sa Fuentes Road sa barangay Pajac, utlanan nga bahin sa Buaya ug Mactan, eskina sa Marcelo Fernan Bridge sa Pusok area, atubangan sa Talima mini city hall ug  Santa Rosa Port sa isla sa Olango. (BANAT NEWS)