Ex-convict giulo pagpusil kritikal

CEBU, Philippines - Kritikal ang kahimtang sa usa ka ex-convict nga gipusil  sa ulo  sa w ala hiilhing  kriminal  nga nagsakay  og  motorsiklo   didto sa barangay Luray-2, siyudad sa Toledo niadtong Sabado sa alas 7:20 sa gabii.

Ang biktima mao si Dionato Manayon, 43, minyo,  taga  barangay Dumlog, sa maong dakbayan  ug usa ka ex-convict nga  nanginabuhi    isip   drayber  sa traysikad.

Si SPO4 Carmilito Hornales, desk officer sa Toledo City Police   Station  mibutyag sa Banat News  nga samtang  nagpadagan  sa iyang  traysikad  ang  biktima  pag-abot  sa maong  lugar  kalit  lang  gisakdapan sa kriminal  nga  nagsakay  og  motorsiklo.

Unya  milanit  sa  iyang  armas  ang  naglingkod  sa likod  sa maong  motorsiklo  dayon  giulo  pagluthang  ang  biktima.

Dihang  nahagbong  sa  iyang  traysikad  ang  biktima,  nagtuo  malagmit  ang  kriminal  nga  patay  na  kini  mipasirit  og  dagan  sa  ilang  sakyanan  pahilayo  sa maong  lugar.

Ang mga estambay  sa maong  dapit maoy  mitawag  dayon  og  polis sa  pagpahibawo  sa maong  hitabo. Samtang  gihatud  usab  dayon  nila  ngadto  sa Toledo City District Hospital  ang  biktima  apan gibalhin  usab  dayon kini sa  tambalanan  sa dakbayan sa Sugbo ug sa pagsuwat  ning  balita  wala pa masayri ang kahimtang niini.

Padayon pang  gihimo sa kapolisan  ang  imbistigasyon  sa maong  hitabo  apan  may teyorya sila     bahin  sa posibling  gipanimaslan  ang  biktima  sa iyang  mga  atraso. (/WC)(BANAT NEWS)