Pag-export og bugas sugdan na

CEBU, Philippines - Gidasig  sa kagamhanan  ang  mga  mag-uuma  sa Central  Visayas  nga  moduyog  sa  kasamtangang misyon  sa pagpalambo  sa    produksyon  sa kaumahan  ilabi  na  karong  mosulod  na  ang  kagamhanan sa merkado  sa mga  nasud  sa gawas  sa Pilipinas.

Matud  pa  ni  Luyo-luyong  Kalihim   Dante De Lima  sa Department of Agruiculture (DA)  nga kining  pag-entra  karon  sa Pilipinas  sa pagpamaligya  og  bugas  ngadto  sa gawas, nagkahulogan  nga  nahimo  na  nga exporter  og  bugas  ang  kagamhanan  imbis  importer  niini  sa nanglabay  nga  katuigan.

Gipadangat  ni De Lima  ang  maong  kasayoran  sa tanang  rehiyon  sa nasud  aron  sa pagpadasig  sa tanang  mga  mag-uuma  nga  motampo   niining  maong  misyon  pinaagi sa makugihong  pagtikad  sa ilang  kaumahan  ilabi  na  sa  natad  sa kahumayan.

Niining  pagka-exporter  sa  kagamhanan  og  bugas,  nagpasabot  kini  nga  labing  gikinahanglan  ang  daghang  supply nga  bugas  busa  makatarunganon  lamang  nga  gikinahanglang maka-supply og  daghan ang mga mag-uuma.

Matud  pa  ni  De  Lima  nga  kun  daghan  ang  produksyon,  natural  dako  usab  og  kitaon  ang  mga  mag-uuma  nga  maoy  labing  gikinahanglan  nila.      

Samtang  si Kalihim  Proceso  Alcala sa DA mipahibawo  nga  talagsaong  klase  sa humay  ang  ipamaligya  sa Pilipinas  ngadto sa gawas  nga  maoy angay  tutokan  sa  mga  mag-uuma  aron labi  silang  mokita  og  dako sa maong  mga produkto.

Kini  mao  ang Aromatic, Long Grain, Colored  ug  kadtong organic  brown rice,  nga pulos  matang  sa  humay  nga himalitan  usab  kaayo  didto  sa gawas.

Matud  pa  ni  Alcala  nga  pinaagi  sa abag  sa mga mag-uuma   gitinguha  sa  kagamhanan  pinaagi sa DA nga  makabaligya  og humay  ngadto  sa gawas  sa di mokubos  sa usa ka gatos  ka metriko tonelada  nga  fancy, colored  ug  organic  rice  niining  tuiga.           

Si De Lima  kinsa  sa samang  higayon  maoy  National Rice Program Coordinator  nagkanayon  nga  motumod  ang nasud  og  pasiunang  napulo ka libo  ka metriko  tonelada  nga fancy, colored  ug  organic  rice  ngadto sa mga nasud  sa Macau ug  Hongkong.

Midugang  siya  nga  ang  maong  mga  produkto  maggikan   sa  rehiyon  sa Cordillera  ug  sa lalawigan  sa Quezon  kinsa  maoy  nananom  sa  mga  mahalong  klase  sa humay.

Sa umaabot  nga  katuigan, gitinguha sa kagamhanan  nga  makahandos  na  kini  og  labi  pang daghang  bugas diin  sa tuig 2016  kinahanglang  mokabat  na  sa tulo ka gatos  ka libo  metriko  tonelada   ang  ikabaligya   ngadto sa nagkalainlaing    nasud  sa gawas. (BANAT NEWS)