Papa miunay’g luba sa anak

CEBU, Philippines - Gumikan sa kahubog,  giunay og dunggab  sa usa ka  amahan  ang  iyang  anak  nga drayber  sa  traysikad sulod  sa ilang  balay  sa dalan Duterte,  barangay Suba  sa dakbayan  sa Danao  sa miaging  gabii.

Ang  biktima mao si Gerome  Manipis, 19, ulitawo samtang    ang suspetsado  mao si Guillermo Manipis, 48, minyo,  nga  kaugalingong amahan  sa biktima kinsa    pulos nagpuyo sa maong dapit.

Si  PO1  Wendel  Jay Baritua  sa kapolisan  sa maong dakbayan  nagkanayon  nga gikapoy ang biktima sa tibuok adlaw nga pagpamasahero sa iyang traysikad nga maoy hinungdan nga sayo kining mipauli sa ilang balay.

Dugang pa ni PO1  Baritua nga samtang naglingkod-lingkod ang biktima  sa sulod  sa  ilang  balay,  kalit lang  miabot nga nagwandog-wandog sa kahubog  ang   iyang amahan nga nagpaninggit  “kinsay isug”.

Busa gibadlong  kini  sa biktima, apan nasuko  kini hangtud  nga  nagkalalis  sila.

Sa  dihang  miinit  na  ang  ilang  lalis, nahutdan  sa katarungan  ang  amahan  ug  mikuha  kini  og  kutsilyo  sa ilang  kusina dayon  gihansak  sa abaga  sa  biktima.       Matud pa ni PO1 Baritua nga dali nga gidala sa iyang inahan ang biktima ngadto sa Danao Provincial Hospital apan human sa pasiuna nga pagtambal  gibalhin  usab  dayon  kini ngadto sa Vicente Sotto Memorial Medical Center sa dakbayan sa Sugbo.

Si PO1 Baritua miingon nga dihang ilang gisusi ang balay   ang  suspetsado wala na kini nila maabti  ug  ilang gituohan nga milayas  kini pahilayo sa maong dapit.  (BANAT NEWS)