2 polis gitabanga’g kulata bun-og

CEBU, Philippines - Naangol ang duha ka polis human sila  kulataha  sa giingong  mga  silingan  sa usa ka  coordinator sa masiao   nga  ilang  gisuwayan  og  sikop didto  sa sitio Magtalisay, barangay Mabolo, Dakbayan sa Sugbo sa miaging  gabii.

Ang mga nabun-og   sa nagkalainlaing  bahin  sa lawas  mao sila  si  PO2 Felix Tuñacao ug PO2 Roy Bacus nga pulos nadestino sa Mabolo Police Station. Gumikan sa kadaghang  nagtabang  pagkulata  kanila  wala  na  silay natumbok  nga  suspetsado  ug  tungod  kay  dili  usab  tantong  grabe  ang  ilang  kahimtang  igo  lang  silang  nagpakorasyon  sa hospital  apan  wala  sila  magpabilin  didto. Si SPO1 Jonax Velex sa Mabolo Police Station  nagkanayon nga ang ilang kapolisan mironda sa balay ni Ester Calamba  ang  giingong  coordinator  sa masiao. Sa diha nga naabot na sila sa maong lugar ilang nakit-an si Calamba nga nag-tally sa mga numero sa gituohang illegal nga sugal.

Apan dihang  ila  na unta  kining  dakpon  gikatahong gibabagan sila sa mga molupyo sa maong dapit, gidumog sila   ug  gitabangan    og  kulata. Gani, atol sa gikatahong kaguliyang giingong lakip nga mibabag  sa  mga  polis  mao  sila  si  Mauricio Maraba ug Booby Jumao-as.

Sa diha nga mitawag   og  panabang  ang  kapolisan  sa mga kauban  nila  sa Mabolo Police Station  dali  usab  kaayong  nakaikyas   si Calamba ug ang  mga  kauban  niini  nga  sila  si  Maraba ug Jumao-as. Sa pakighinabi sa Banat News ni City Intelligence Branch Chief Insp. Romeo Santander kini mibutyag nga obligado gayud ang kapolisan nga mopatuman sa maximum tolerance kun aduna kini operasyon nga himoon.

Ang kapolisan sa Mabolo nagpatabang karon sa barangay aron masikop  si Calamba

Nasakmit  sa kapolisan ang mga illegal gambling paraphernalia  ni Calamba  didto  sa balay  niini. (BANAT NEWS)