Canada mihatag og kahimanan sa sunog sa Talisay
CEBU, Philippines - Kagamhanan sa dakbayan sa Talisay daku ang kahangop sa gihatag nga mga ekipo sa fire fighting sa Wetaskiwia Fire Station sa Wetaskiwia, Alberta Canada ngadto sa Talisay City Fire Station.
Si Bise Mayor Alan Bucao, chairman sa committee on public safety sa siyudad nagkanayon nga 41 ka set sa fire helmets, visors, fire boots, bonnets, gloves ug coats ang nadawat nga donasyon gikan sa Wetaskiwia Fire Station.
Niadtong Pebrero 22, 2013 ang Wetaskiwia Fire Station pinaagi ni Simoun B. Canton III ang mitugyan sa nahisgutang mga protective fire fighting gears ngadto sa Talisay City Fire Station.
Matud ni Bucao nga ang maong paghatag og mga fire fighting gear daku og tabang ngadto sa kabomberohan sa siyudad ug ang kagamhanan sa Talisay mapasalamaton kaayo niini.
Sa milabay’ng semana ang siyudad usa sa nakadawat og usa ka fire truck gikan sa Bureau of Fire Central Office.
Sa laing bahin, si BFP-7 director Maria Luisa Hadjula nagkanayon nga ang kapabilidad sa mga fire department sa Central Visayas mapalambo na unya kini human nga ang central nga buhatan sa Manila migahin og unom ka mga fire truck sa rehiyon. Matud ni Hadjula nga ang maong mga firetruck naggikan sa nasud sa Austria ug gilaumang maabot kini niining buwana.
Ang mga nagahinan og mga bag-ong fire trucks dinhi sa rehiyon mao ang Cebu, Talisay, Mandaue, Lapu-Lapu, Tanjay ug Bayawan sa Negros Oriental. (BANAT NEWS)
- Latest
