Mga tanod bansayon

CEBU, Philippines - Ang officer-in-charge sa Talisay City Police Station nagtinguha sa pagpauswag sa Barangay Peace Action Team (BPAT) sa siyudad aron dunay mga multiplier force nga makatabang sa kapolisan sa pagmentinar sa kahusay ug kalinaw.

Si Superintendent Elmer Lim nagkanayon kini nga nagkaistoryahanay na sila sa presidente sa Association of Barangay Captain (ABC) nga si kapitan Charles Basillote sa Dumlog kabahin sa nahisgutan niyang plano.

Matud ni Lim nga matag barangay pangayoan  niya kini og lima ka mga tanod nga ipaubos sa training sa BPAT. Ang Talisay duna kini 22 ka mga barangay.

Usa sa rekisitos nga  dawaton isip BPAT ang edad nga dili molapas sa 45-anyos. Gipasabot ni Lim nga ang mga BPAT mao kini magsilbing polis diha sa ilang mga barangay hinungdan nga gikinahanglang dili mga tag-as na og edad ang pili-ong miyembro niini.

Gibutyag ni Lim nga nakauyon si Basillote sa maong plano apan nagkinahanglan kini og budget. Sulod sa lima ka adlaw nga training nagkinahanglan og P100 mil ngadto sa P150 mil nga budget alang sa instructor, pagkaon, uniporme sa BPAT, office supply ug uban pang mga gikinahanglan sa training.

Hinuon si Lim nanghinaot nga ang kabarangayan mosuporta sa maong proyekto ug unta maoy mosagubang sa budget sa mga tanod nga ilang ipadala.

Si Lim nagkanayon nga bisan og matag tanod hatagan kini sa barangay og P1,000 nga budget diin sa lima P5,000 tanan aron dili bug-at nga sagubangon sa ABC o sa kagamhanan sa Talisay. Ang OIC midugang nga nanghinaot siya nga human sa eleksiyon sa Mayo niining tuiga maimplementar na ang maong proyekto. (BANAT NEWS)