BID sa airport bag-o na’g hepe

 CEBU, Philippines - Bag-o na ang hepe sa sangang buhatan sa Bureau of  Immigration and Deportation (BID) sa Mactan Cebu International Airport (MCIA) ilis  sa na-promote nga  si  Nelson  Gallentes.

Si Atty. Brandon Enad mao  na karon  ang  bag-ong hepe  sa BID  sa  MCIA  kinsa  kanhi  usab  maoy  Chief of Staff ni BID 7 Regional Director Casimiro Madarang III. Si Enad  nahimo  usab  usa  sa  mga legal officer sa maong buhatan sulod  sa duha ka tuig .

Mismo si BID Commissioner Ricardo David maoy miluwat og kamanduan sa pagbutang kang Atty. Enad sa tugpahanan isip Alien Control Officer (ACO) sa milabay’ng bulan ug pormal na kining gipatuman sa dihang milingkod na kini sa maong katungdanan.

Sa  iyang bahin  si Enad mipasidaan  nga ang istriktong implementasyon sa balaod batok sa mga bag-ong  moabot o kaha   mobiyang langyaw sa tugpahanan iyang  ipatuman ilabi na ang pag-monitor sa human trafficking nga maoy unang mando nga gitahas kaniya ni  David.

Lakip sa atimanon ni  Enad mao ang ilang sangang buhatan sa BID 7 nga  nahimutang sa Gaisano Mactan Island Mall sa dakbayan sa Lapulapu alang  sa kasayon nga duolan  sa ilang mga kliyenteng langyaw. (/WC)  (BANAT NEWS)