Piskat ug heat stroke bantayanan

CEBU, Philippines - Ang Department of Health sa Central Visayas (DOH-7) mipasidaan sa publiko nga magmabinantayon kalabot sa mga sakit-sakit nga mahimong motakboy karong panahon sa ting-init sama sa piskat (sore eyes ug usab heat stroke.

Matud pa ni Health Assistant Secretary Paulyn Ubial nga ang kasagarang mga sakit nga mohugpa kun ting-init mao ang sore eyes ug heat stroke.

Dugang pa ni Ubial, nga pipila sa mga sinyales sa heat stroke mao ang grabe nga pagka-uhaw, pagpamugnaw ug pagkalipong nga kung dili kini matagad  dayon, malipong ang tawo ug mahimo usab kining ikamatay.

Sa bahin usab ni DOH-7 Regional Executive Director Dr. Asuncion Anden siya miingon nga kinahanglang ang publiko moinom og walo ka basong tubig o labaw pa niini matag adlaw, manarapo og bugnaw nga labakara sa lawas, magsuot og preskong sapot ug likayan ang pagpa-init ilabi na gikan alas-10:00 sa buntag hangtud alas-2:00 sa hapon.

Gibutyag ni Anden nga pinaagi sa hustong pagpanghugas sa mga kamot, posibleng malikayan gayud ang sore eyes. (/WC) (BANAT NEWS)