3 ka adik ug 1 ka tulisan sikop

CEBU, Philippines - Tulo  ka  drug addict  ang  nasikop  sa kapolisan  nga mironda  sa usa  ka  giilang  drug den  kon  tapokanan  sa  mga  tiggamit  og  gidiling  drugas   sa dalan  Palma,  barangay San Roque, dakbayan  sa Sugbo  kagahapon  sa alas  10:00  sa buntag.

Ang mga nasikop   nailhan  nga  sila  si  Eric Caña, 19, Dennis Rivera Reyes, 35, Michael Aguilar Pavo Jr., 27 , ug Estella Conejos  ang giingong  tag-iya sa balay  nga  gihimong  drug  den.

Ang  maong ronda  gilusad  sa kapolisan  human  madawat niini  ang taho kalabot sa giingong presensya sa usa  ka tulisan  nga  mibiktima  og  estudyante  sa miaging gabii sa barangay Tinago, hinungdan nga mipahigayon sila og hot pursuit operation kagahapon sa buntag.

Apan imbis ilang masikop ang ilang target  ug  gipangita  nga tawo, dihang misulod sila sa gipaabangang kwarto ni Conejos,   maoy  naabtan  nila  sa akto  ang  mga  suspetsado  uban  sa  mga  gamit  niini  sa  pagsuyop  og  shabu  ug duha ka putos  sa gituohang ginadiling drugas.

Ang hepe sa kapolisan sa Police Station 3  nga si Chief Insp. Wildemar Tiu mibutyag nga base sa iyang nakuhang impormasyon,  dugay-dugay  na  nga  gihimong drug den sa  mga  drug addict ang   balay ni Conejos.

Samtang padayon  pang gisuta  karon sa kapolisan  kun  si  kinsa  ang  namaligya  og gidiling  drugas  sa  maong  dapit.

Sa laing bahin, nasikop usab sa kapolisan ang usa sa mga nanulis sa usa ka menor de edad nga tinun-an sa kolehiyo   sa   miaging gabii

Ang nasikop mao si Emilito Torrejos Familiar  alyas Lalat, 18 ,  kinsa  nasakmitan  og kalibre .38 snubnose  revolver  nga adunay upat ka bala.

Ang dinakpan positibong gitudlo sa biktima nga  maoy  mition  og  kutsilyo  kaniya  dayon  mideklarar og  tulis   ug  gisakiyo  ang  iyang  laptop  ug cellphone.

Ang  mga  dinakpan   gitanggong  na  sa prisohan  samtang  gihikay  na  ang  tukmang mga kaso  nga  ilang  atubangon. (WC)  (BANAT NEWS)