Gambling machines, shabu nasakmit sa RAIDSOTG

CEBU, Philippines - Usa ka bulto ug laing 28 ka mga gagmay’ng pakete sa gituohang shabu ang nasakmit sa kapolisan sa Regional Anti-Illegal Drugs Special Task Group (RAIDSOTG) pasado alas-8 kagabii diha sa sitio Santa Cruz barangay Duljo Fatima.

Ang nasikop mao si Mark Vergil Amamence, 18, molupyo sa maong lugar kinsa nakuhaan og usa ka medium pack nga gituohang shabu ug 28 ka sachet sa gituohang shabu.

Sa pakighinabi sa Banat News ni Inspector Aibert Jay Samson, ang team leader sa RAIDSOTG mibutyag kini nga mipahigayon sila og pagpangronda batok sa illegal nga sugal sa maong lugar apan di lang gambling machines   ang ilang nakuha.

Gawas sa tulo ka mole-mole ug duha ka video karera ilaha usab nadakpan si Amamence nga diha usab sa maong lugar nga adunay kadudahang gibitbit.

Dihang gisita sa kapolisan, nasayran nga illegal nga drugas diay ang gibitbit sa batan-on.

Si Amamence matud pa bag-ohay pa lang nga nasulod sa maong kalihukan  ug tungod sa kawalay klarong kakuhaan og panginabuhian misulod siya sa maong negosyo. (/EIM) (BANAT NEWS)