P219M gahin alang sa mga bata sa day care

CEBU, Philippines - Ang Department of Social Welfare and Development (DSWD) sa Central Visayas migahin og P219 milyones alang sa Supplementary Feeding Program (SFP)  sa kabataan kinsa  nagtungha  sa mga  Day Care Center sa maong  rehiyon.

   Matud pa ni Jaybee Binghay, tigpamaba sa DSWD-7  nga ang SFP usa ka probisyon bahin  sa pagkaon   sa kabataan sa snacks ug  paniudto sulod sa lima ka adlaw sa matag semana hangtud  matapos ang 120 ka adlaw.

Dugang pa ni Binghay nga kini pagadumalahon sa mga ginikanan gamit ang mga lumad nga matang sa pagkaon.

Sumala pa usab ni DSWD-7 Regional Nutritionist Melinda Canares nga ang maong programa mapahimuslan sa 4,173 ka Day Care Center  sa Central Visayas nga may  mga bata  nga  mokabat sa  140,385.

Gipadayag ni Binghay nga kining maong programa mosilbi sa mga day care center  sa tanang syudad ug kalungsoran sa Bohol, Sugbo, Negros Oriental ug Siquijor.

Sa laing bahin ang DSWD-7 nanghinaut nga mapalambo ang kaalam sa maayong pamatasan sa mga bata nga nagtungha sa Day Care Center  nga maoy tinguha  sa kagamhanan.

Gibutyag ni Binghay nga sa SFP, ang kabataang benepisyaryo pagatimbangon  inig sugod  na  niya  pagtungha  hangtud  nga  matapos  ang 120  diyas  aron  masayran  ang kalamboan sa iyang  panglawas. (BANAT NEWS)