2 ka pusil nasakmit sa taga Customs

CEBU, Philippines - Nasakmit sa mga sakop sa Customs police ang duha ka abandonadong armas mobuto nga gisulod sa usa ka container van sa Cebu International Port sa milabay’ng  adlaw.

Ang maong  container  van  nga  nahimutangan sa maong  armas  giingong  gikan  sa  Estados Unidos.

Base  sa  mga  papeles ang  maong  kargamento  nga  gideklarar  nga  mga  personal effects,  ginganlan  og Ronald  Banks  ang  tag-iya niini  nga nagpuyo sa dakbayan sa Sugbo. 

Gumikan kay milapas na sa tagal ang maong kargamento  nga  wala kuhaa sa tag-iya  gi-inspection kini sa mga  polis  sa customs  hinungdan  nga  nadiskubrehan  ang  duha ka armas  de fuego  sa sulod  niini.

Nadiskubrehan  kini  nila  ni SA1 Andie Catre ug SA1 Jeffrey Alindogan nga  mga  polis  sa customs uban sa mga customs examiner sulod  sa  usa ka vault sa maong container van  sa pag-abli nila niini.

Busa  gimando  dayon  ni Customs District  Collector  Edward dela Cuesta  ang  pagsakmit sa  kalibre .45 ug kalibre .357  uban  sa mga  bala  niini.

Matud pa ni Dela Cuesta ug ni Maj. Casculan nga  bunga  kini  sa hugot  nilang pagmonitor sa mga armas nunot  sa gun  ban  nga  gipatuman sa Comelec alang  niining  nagkaduol  nga piniliay  sa nasud. (BANAT NEWS)