Balay sa notadong tulisan gi-raid, mga armas ug granada nasakmit

CEBU, Philippines - Armas, bala ug granada ang nasakmit sa kapolisan atol sa pagpangronda nila sa panimalay sa usa ka notadong tulisan sa dakbayan sa Sugbo pasado alas-12 sa tungang gabii diha sa barangay Pasil.Ang panimalay ni Ronilo Gequillo alyas Nilo, gi-ronda pinasikad sa search warrant nga giluwatan ni RTC-7 Branch 57 Judge Enriquita Loquillano-Belarmino.

Ang mga sakop sa City Intelligence Branch (CIB) nakadawat og taho kalabot sa paghupot og mga armas ni Gequillo hinungdan nga ila kini nga gi-aplayan og search warrant.

Daling nakaipsot si Gequillo sa pag-abot sa mga polis diha agi sa bintana, apan sa pagsusi sa balay niini nakuha ang usa ka kalibre .45 pistola ug kalibre .38  rebolber ug usa ka fragmentation grenade, magazine sa armas ug mga bala.

Sa pakighinabi sa Banat News sa hepe sa CIB nga si Chief Insp. Romeo Santander kini mibutyag nga notadong tulisan sa dakbayan sa Sugbo si Gequillo ug gihimong tagoanan sa mga armas sa ubang mga tulisan ang balay niini. Dugang pa ni Santander nga ila pa karun nga gisuta ug kun si kinsa pa ang mga kaubanan ni Gequillo. (BANAT NEWS)