NSO nag-survey sa mga mananagat ug mag-uuma

CEBU, Philippines - Nagpadayon  ang  kapin sa  duha ka libo  ka  mga  enumerator  kon  surveyor  sa  National Statistics Office (NSO)  sa  pagpanglista  karon  sa  mga  pamilyang  mag-uuma  ug  mananagat  sa Cenral  Visayas.

Matud  pa  ni NSO7 Regional  Director  Ariel E. Florendo  nga  nagsugod  niadtong Pebrero 25  ug gituohang  mahuman  kini  sa dili pa matapos  ang  Marso.

Ang  maong  census  sa  mga  mag-uuma  ug mananagat  sa tibuok  nasud  gilusad  sa  NSO  aron  masayran  ang  katibuk-an  nilang  gidaghanon  sa pagkakaron.

Matud  pa  ni Florendo  nga  kining maong  matang sa  survey  ipahigayon  sa  NSO  matag  lima  ka tuig  aron basehan  sa nasudnong  kagamhanan  sa  mga  proyekto  nga  angay  ilusad  niini  aron  katabangan  nga  moasenso  sa panginabuhi  ang  mga  mananagat  ug  mga  mag-uuma  sa nasud.

Pipila sa  mga  butang  angay  sayron  sa  mga  surveyor  sa  NSO  mao  ang  ginamiton  sa panagat,  nga maglakip sa sakyanan, pukot  ug  matang  sa panagat  lakip  na ang  ilang  kinitaan  pagsuta  kun makasapar  ba  sa gidaghanon  sa ilang  mga anak.

Mao  usab  ang bahin  sa mga mag-uuma  diin  sutaon  usab  ang  mga kahimanan  sa ilang  pagpanguma  nga  maglakip  sa gidak-on  sa ilang  uma.  Mga  matang  sa tanom  nga  ilang  gipananom,  mga  hayopan  ug  kinitaan aron  pag-ila  kun  mosakar  ba  sa gidaghanon  sa ilang  mga anak  ang  ilang  kinitaan.

Midugang  si  Florendo  nga sayon  ra ilhon  ang  mga  NSO  enumerator  tungod  sa ID, payong  ug uniporme  niini  nga dili angay  kahadlokan  sa  mga  tagbalay  kun  moduol  ug  manginterview  kini  kanila.

Sa samang  higayon  giawhag  usab  niya  ang  mga  opisyal  sa barangay  nga  mosuporta  sa mga  surveyor  sa NSO  sa ilang  barangay  pinaagi  sa pagpahibawo  sa ilang  mga  molupyo  sa pag-atiman  sa  maong  mga  surveyor  nga  mosaka  sa ilang  balay  ug hatagan  sa mga  impormasyon  nga  ilang  gikinahanglan.

Midugang  si Florendo  nga  human  sa maong  survey  ila dayon  kining  ihandos  sa ilang  buhatan  sa kaulohan  aron  masuta  ang  tanang  gidaghanon sa mga pamilyang  mananagat  ug  mga  mag-uuma  sa tibuok  nasud ug sa  samang  higayon  matun-an  sa nasudnong  kagamhanan  ang  mga  butang  ilang  buhaton  aron  matabangan  ang sector  sa  mga  mananagat  ug  mag-uuma sa nasud.( /WC)  (BANAT NEWS)