DUHA hired killer sikop

CEBU, Philippines - Nadakpan sa kapolisan ang duha ka mga lalaki nga gidudahang “hired killer” didto sa usa ka lugar sa barangay Pajo, lungsod sa Daanbantayan sa miaging gabii.

Ang nadakpan  mao sila si Henry Pepito, 29, minyo,   nga taga Sitio Relis, barangay Basak siyudad sa Mandaue ug ang kauban niini nga si Hervin Martinez, 51 , minyo,  nga  lumad nga taga Buenavista, Tandag City, Surigao Del Sur ug  temporary  usab nga nagpuyo sa Basak, Mandaue.

Si PO1 Aldwin Pepito sa Daanbantayan Police Station mibutyag sa Banat News nga samtang nagpahigayon og checkpoint ang  iyang  mga  kaubang  polis  sa maong higayon usa  ka tawo  ang  mipahibawo  kanila  kalabot  sa mga suspetsado   nga nasigpatan  niyang nagtangkil  og armas  de fuego. Sa  pagkahibawo  sa  mga  polis  giduol  ug  gikapkapan  dayon  niini  ang  duha ug  didto  nasakmit  ang  ilang   .38 kalibre  nga revolver ug .45 kalibre  nga  pistola nga  giluklok  sa hawak.

Gumikan sa kapakyas  sa pagpakita og tukmang  papeles  gibalhug  dayon sa prisohan, kinsa gidudahan  nila  nga  gun  for  hire  ug  ang  kaso  nga  may  labot  sa Comelec  gun ban  gipasaka  na  batok sa maong  mga  suspetsado.( /WC)  (BANAT NEWS)