11 anyos naligo nalumos

CEBU, Philippines - Milutaw ang patay’ng lawas sa 11 anyos nga bata nga gituohang nalumos  sa sitio Bouldeseran sa barangay Labogon, dakbayan sa Mandaue  sa  miaging adlaw.

Si SPO1 Gregorio Cabizares sa kapolisan sa Presinto 3  sa Mandaue City Police Office  (MCPO) miila sa biktima  nga  si John Lee Ray  Gilig, 11, taga sitio Latasan sa nahisgotang barangay sa maong dakbayan.

Matud pa ni SPO1 Cabizares nga nahinabi sa Banat News nga kuyog sa silingang mga bata si Gilig nga naligo sa dagat  duol sa shipyard sa maong dapit.

Dugang pa niya nga samtang naglangoylangoy kini  kalit lamang nawagtang busa ila dayong  gipahibalo ang amahan  niini.

Si SPO1 Cabizares nagkanayon nga si  Kapitan Damaso Tumulak sa barangay Labogon nga nakadawat sa maong kasayuran  mipahibalo dayon sa buhatan sa kapolisan sa Presinto 3   kinsa  mitubag  usab  dayon  sa maong alarma.

Pipila  ka  gutlo  human  suhira  ang  palibot  sa lugar  nga  gikaligoan sa biktima ila  kining nakita nga  naglutaw  sa  dagat.( /WC)  (BANAT NEWS)