Mayor Diamante, duha ka opisyal gireklamo diha sa Ombudsman

CEBU, Philippines - Pormal nga gipasakaan og reklamo sa buhatan sa Visayas Ombudsman si Mayor Democrito “Aljun” Diamante ug laing mga opisyal sa lungsod sa Tuburan gumikan sa giingong mga kahiwian sa pagdumala niini sa lungsod ug ingon man sa pag-abuso sa gahom.

Si Konsehal Marie Segarra Tabotabo nga kanhi kaalyado ni Diamante maoy misang-at sa reklamo kagahapong adlawa.

Gawas kang Diamante, ang gipasakaan og reklamo sila si Agnes Hoyohoy, kalihim sa Sangguniang Bayan ug ingon man ni Laarni  Pasaylo ang municipal accountant.

Reklamo nga serious misconduct, grave abuse of authority ug conduct unbecoming of public officer ang gipasaka batok sa tulo.

Giawhag ni Segarra  ang Visayas Ombudsman nga mohimo’g dinalian nga pakisusi sa iyang reklamo sama sa giingong pagpabor sa mayor sa mga kabanay nga mga magpapatigayon nga dunay mga transaksyon sa lungsod.

Kini sama sa AJB Auto Repair Shop nga gipanag-iya sa bayaw ug igsuon sa mayor Teresa Diamante Balbedo ug ang Silver Plate Restaurant diin ang tag-iya mao si Ruben Diamante, igsoon sa mayor.

Ang AJB Auto Repair Shop maoy nag-ayo sa gubaong mga sakyanan sa lungsod ug ang Silver Plate Restaurant mao usab ang gigamit sa lungsod kun adunay mga dagkong okasyon.    

Lakip sa gikwestyon ni Tabotabo mao ang dakong gasto sa pagkaon sa dihang adunay medical mission nga gihimo sa lungsod.

Laing gitumbok ni Tabotabo ang mga pamaagi ni Diamante pagpaabot sa tambal ngadto sa mga kabus sa lungsod; pagtukod sa boulevard lakip na sa mga lamp post niini.  Matud pa ni Tabotabo kinahanglang imbestigahon sa graft office ug sa Commission on Audit ang mga transaksyon sa lungsod.

Si Diamante daan nang mihimakak sa mga alegasyon batok kaniya ni Tabotabo. Gani gidepensahan siya sa mga konsehal sa lungsod bahin sa maong pasangil.

Si Diamante miklaro nga panerbisyo ang iyang panarbaho sa lungsod ug dili pangurakot. Atol sa gipatawag niyang press conference usa ka semana na ang nakalabay, si Diamante nagdudang pamolitika ang nagpaluyo sa maong reklamo.( /EIM) (BANAT NEWS)