Kapolisan mipahigayon og hostage taking drill sa eskuylahan sa Naga

CEBU, Philippines - Usa ka hostage taking drill sa kapolisan ang gihimo sa sulod sa Naga City Central School sa siyudad sa Naga kagahapon sa buntag. Kapolisan sa Naga, inubanan sa kapolisan sa Cebu Provincial Police Office ug sa Special Reaction Unit (SRU) mipakita sa ilang katakos sa pag-neutralize sa hostage-taker.

Atol sa maong exercise daghang nakitang kakuwangon sa kapolisan si Cebu Provincial Police Office director Sr. Supt. Patrocinio Comendador. Matud pa ni Comendador kuwang ang coordination sa ground commander ug sa negotiator sama na lang sa paghatag dayon sa negotiator sa tanang pangayoon sa hostage-taker bisan kinahanglan pa ang assessment sa ground commander.

Nasuta usab nga kuwang sa training ang negotiator, kuwang sa force protection equipment ang SRU sama sa ballistic shield ug Kevlar helmets. Wala say naka-standby nga doktor ug psychologist o social welfare officer nga motabang dayon sa mga batang gi-hostage, way klarong ihap sa mga bata human mabuhii sa hostage-taker ug uban pa.

Hinuon matud pang Comendador nga bisan sa mga kakulangon, makonsiderar nga malampuson kini. Sumala pa niya dili gyud mahitabong walay makitang apan sa mga exercises ug pinaagi niini ilang makurihian ang mga sayop.

Dako ang pasalamat sa principal sa maong tunghaan nga si Nenita Canomon nga mao gyuy mihangyo sa kapolisan nga mopahigayon og aktuwal nga drill kalabot sa hostage-taking.

Matud pa ni Canomon nga mas labing maayo nga gipakita sa kapolisan ang mga angayan nilang pagabuhaton kun adunay hostage-taking nga mahitabo sa ilang tunghaan. (/EIM)  (BANAT NEWS)