Tulisan misukol sa polis napusilan

CEBU, Philippines - Napusilan sa  polis  ang usa  ka suspetsadong tulisan nga armado  og nagkalainlaing  kalibre  sa armas  de fuego dihang mihana  kini  og sukol  sa  mga polis didto sa Sitio Riverside, Poblacion Oriental, lungsod sa Consolacion sa miaging hapon.

Ang suspek   nailhan  nga  si Allan Ebalan, 36 anyos, minyo,  ug lumad nga taga Calape, Bohol apan kasamtangang nagpuyo sa maong lugar. Ang suspek  nasakmitan og kalibre .38 nga revolver  ug kalibre .45 nga pistola  ug beltbag nga gisudlan sa  iyang kinawat nga upat ka bulawang necklace nga mokantidad ang tanan og kapin sa  usa ka milyon ka pesos. Nakuhaan usab kini og mga kagamitan sama sa pisi, bara de kabra, cutter   ug gabas  sa puthaw. 

Si PO2 Johnaskie Romero, desk officer sa Consolacion Police Station  mibutyag  sa  Banat News nga nadakpan  nila  ang suspek  human  mosumbong  kanila si Avel  Maglasang, ang nagbantay  sa balay  nga  gilungkab  sa suspetsado.

Sa pagrespondi sa mga polis nasakpan sa akto ang suspek apan misuway  kini  og  dagan  hinungdan  nga  gigukod  nila.

Dihang  naapiki  na  kini  misuway    og  lanit sa  iyang duha ka armas nga gitakin hinungdan nga giunhan  na lang pagpusil   ni PO3 Edmund Melendres ug maayong  pagkaigo sa tuong  kilid  niini.

Dihang  nalup-og    gisakmit  dayon  sa kapolisan  ang iyang   duha  ka armas ug  ang beltbag, ug human  patambali  sa hospital    gibalhug  dayon  sa prisohan  samtang  gihikay  na  ang kasong  ipasaka  batok niini. (Darrel A. Carumba, Romeo T. Limpangog ug Bong Soriano/WC)(BANAT NEWS)