Police asset giulo pagpusil

CEBU, Philippines - Nagkaob daplin sa karsada   nga naglunang sa kaugalingong dugo ang usa ka giingong police asset kinsa gipusil patay sa  wala  hiilhing  kriminal sa sitio Redrads, Basak-Bontores, sa barangay Basak- San Nicolas, dakbayan  sa Sugbo  sa miaging  hapon.

Ang biktima nailhan nga si Antonio Delfin, hingkod, nga   nagpuyo  sa maong  dapit. Sa pasiunang imbestigasyon sa kapolisan nasayran nga ang biktima  naglingkod  uban  sa iyang  mga ig-agaw atbang  sa ilang  balay  apan nanlakaw  kini  busa  nag-inusara  na lang  ang  biktima.

Unya  may  duha  ka  wala hiilhing  lalaki  nga naglakaw  agi  sa maong  lugar  apan kalit kining  mibalik    dayong  pusil  ngadto  sa biktima. Ang biktima  nga naigo  sa ulo,  diha-diha  nahagba  sa yuta  ug  nabugtoan  sa kinabuhi.

Bisan wala  magtabon  sa  nawong  ang  mga  mamumuno, apan  walay  nakaila  sa maong  mga dagway  didto  sa dapit  nga nahitaboan. Human  maigo  ang  biktima, dali kaayong  nakapahilayo  ang  mga  kriminal  sa maong  lugar sumala sa  mga  nakasaksi.

Matud ni SPO4 Alex Dacua sa Homicide Section  sa kapolisan sa dakbayan  sa Sugbo nga ang biktima usa kanhi ka asset sa kapolisan ug igsoon usab  sa retiradong polis nga si Benjamin Delfin.

Dugang pa ni Dacua nga adunay posibilidad nga adunay tawo nga nasuko sa biktima hinungdan nga gipatay kini.Gisubay karon ni Dacua ang anggulong personal grudge ug drugas,  base usab sa pagka-police asset sa biktima.Samtang si Kapitan Jorge Rama sa maong barangay mibutyag  nga sayo  niini, iyang  gitambagan ang biktima nga mopauli una sa ilang probinsya human   kini gukda og  duha  ka armadong tawo  sa milabay’ng buwan.

Hinuon ang Homicide section adunay lead sa responsabli sa maong krimen apan dili pa nila kini ibutyag samtang nagpadayon pa ang ilang imbestigasyon  sa maong  hitabo.Ang  mga kapolisan walay nakuhang kabhang  sa bala didto  sa crime scene gawas lang sa holster sa armas nga diha tapad sa gihagbaan sa biktima. (/WC)(BANAT NEWS)