BFP Talisay pa-esplikaron ni Bucao
CEBU, Philippines - Gipangayoan og eksplinasyon ni Bise Mayor Alan Bucao, chairman sa committee on public safety sa dakbayan sa Talisay ang hepe sa kabomberohan sa siyudad kabahin sa giingong wala nila pagresponde sa alarma sa sunog diha sa sports complex sa barangay Poblacion niadtong Sabado sa gabii.
Base sa report nga dunay usa ka tunghaan nga migamit sa sports complex alang sa ilang film showing ug giingong kalit nga dunay mi-spark ug misilaob ang kalayo.
Wala moresponde ang mga bombero tungod kay walay sakyanan nga magamit hinungdan nga ang mga polis na lang ang nagtinabangay og sablig og tubig pagpawong niini.
Si Bucao nga nahinabi sa mga tigbalita kagahapon nagkanayon nga iyang nasayran nga niadtong higayona dili magamit ang mga sakyanan sa bombero tungod kay gipa-down ang transmission niini tungod kay dili na makatangas.
Matud ni Bucao nga sulod sa duha ka oras ang pag-down sa transmission sa sakyanan una pa kini magamit og usab.
Sa maong hitabo gimanduan ni Bucao si Chief Inspector Antonio Ortiz, hepe sa Talisay City Fire Station nga mosumitir og eksplinasyon ngadto sa iyang buhatan.
Ang mga tigbalita napakyas og kuha og pamahayag kagahapon sa buntag kang Ortiz tungod kay wala kini diha sa iyang buhatan nagpahigayon kini og seminar sa usa sa mga barangay sa Talisay.
Sa laing bahin, daw gitubag ang problema sa mga bombero sa Talisay tungod kay kagahapon ang Talisay usa sa midawat og firetruck gikan sa Department of Interior and Local (DILG) sa Camp Crame, sa Quezon City. (BANAT NEWS)
- Latest
