Kapolisan nakig-alayon sa Interpol bahin sa carnapping

CEBU, Philippines - Nakig-alayon na ang kapolisan sa rehiyon 7 sa nagkadaiyang ahensya sa goberno aron matultolan ang gitumbok nga mastermind  sa  sunod-sunod nga carnapping incident sa Sugbo sa milabay’ng buwan.

Ang hepe sa kapolisan sa Regional Intelligence Division (RID)   nga  si Supt. Paul Labra mibutyag nga nakig-alayon  sila karon sa International Police aron masuta ang pagkatawo sa mga Koreanong ilang nasikop sa miaging semana.

Matud pa ni Labra nga gawas sa Interpol nakig-alayon usab sila sa Bureau of Immigration and Deportation  aron usab masayran  niini kun nakagawas na ba sa nasud o sa Sugbo si Lim Ho Sung nga maoy gitumbok nga utok sa maong krimen.

Dugang pa ni Labra nga maora og  naglisod sila karon sa pagsubay   kang Lim tungod usab kay nasuta nila sa BID  nga daghan  na  ang  migawas  sa nasud  nga susama   og ngalan ni Lim.

Hinungdan nga ilang gipaninguha nga makakuha og  birthdate ni Lim aron ilang masuta ang pagkatawo niini ug wala ba kini malambigit og dautang mga buhat sa ilang nasud pinaagi sa tabang sa mga taga Interpol.

Gibutyag usab ni Labra nga ang pakig-alayon nila sa Interpol gihimo  aron  makakontak usab  sila sa mga Korean Police kalabot sa background sa mga nasikop nga Koreano nga nalambigit sa carnapping sa Sugbo.

Gipadayag usab ni Labra nga ila pang gihipos ang  tanang ebidensya nga makatumbok ni Lim nga maoy mastermind sa maong krimen.

Samtang gibutyag usab ni Labra nga ang Koreanong gitumbok usab nga kaubang mastermind sa carnapping dinhi sa Sugbo nga si Chu Hyun Cher alyas Mr. Chu  padayon  pa  nilang  giimbistigar. Gani, matud pa ni Labra nga posibli usab nga ilang mapasakaan og kaso si Chu  luyo  sa  pagtunga niini  sa ilang buhatan ug gilimpyo ang iyang ngalan gikan  sa  pagkalambigit   niya  sa carnapping dinhi.

Ang kapolisan sa dakbayan sa Mandaue, RID ug RSOG nakabawi og   13  ka  Starex van nga gituohang pulos  kinarnap  sa sunod-sunod nilang operasyon.  (BANAT NEWS)