Mangingilad sa tinun-an sa Labangon ipahunong

CEBU, Philippines -  Gusto sa mga opisyal sa Barangay Labangon nga mahunong na ang pagpangilad nga gihimo sa pipila ka mapahimuslanon ngadto sa mga tinun-an pinaagi sa paghimo kunohay og raffle apan ang tinuod dili sila makadaug.

Tungod niini ang konseho sa Barangay Labangon nga gipangulohan ni Kapitan Victor Buendia nagmugna og ordinansa nga magdili sa pagpahigayon og raffle duol sa mga tunghaan aron malikayan nga mailad ang kabataan.

Nabantayan ni Kapitan Buendia nga sa Barangay Labangon dunay daghang nagtanyag og “bunot-bunot” diin ang mga bata pabayron og usa ka peso bugti sa pagbunot og usa ka linikit nga papel diha sa raffle chart.

Gamay ra kaayo ang mga premyo ug barato pa gayud ang kantidad apan hilabihan kadaghan sa mga numero nga pilian sa mga bata mao nga tagsa ra makadaug ang mga tinun-an.

Matud ni Kapitan Buendia nga daghang mga ginikanan nangreklamo tungod kay ang ilang mga anak mogasto sa ilang kwarta nga gitagana unta para “snack” aron ipalit og numero sa bunot-bunot.

Nangindahay si Buendia nga sa ubang mga tunghaan dinhi sa dakbayan sa Sugbo idili usab ang pagpahigayon niining gitawag og bunot-bunot nga ang tumong mao ra ang pagpanikas.

Ang Committee on Laws sa Konseho sa Dakbayan ubos sa pagdumala ni Konsehal Sisinio Andales maoy gitugyanan sa paghimo og pagtoon sa sugyot sa mga opisyal sa Labangon.  (BANAT NEWS)