2 bay patigayon nga sabaan way permit

CEBU, Philippines - Kadtong duha ka balay-patigayon sa Barangay Kasambagan nga gireklamo sa kasaba tungod sa pag-operate og video karaoke namatud-an sa City Hall nga wala nay business permit.

Si City Treasurer Emma Villarete, mitug-an sa mga konsehal sa dakbayan nga ang gipadala niya nga inspection team mi-report na nga wala na mo-renew sa ilang business permit ang Chill Out ug ang Eva Ray Music Lounge.

Matud ni Villarete nga gipahibalo na nila ang mga tag-iya sa mao nga balay-patigayon nga nakalapas sila sa Cebu City Tax Ordinance ug kun padayon sila nga dili mo-renew sa ilang business permit pasirad-an ang ilang negosyo.

Usa ka Gabriel Quisumbing nga lumolupyo sa Barangay Kasambagan maoy mireklamo tungod sa kasaba panahon sa lawom na nga gabii nga gikan sa manganta sa karaoke sa maong balay-patigayon.

Nasuta sa mga sakop sa inspection team nga wala tumana sa mga tag-iya sa balay-patigayon ang balaud nga ang ilang video karaoke ipahimutang nila sa dapit nga adunay sound proof aron dili makabalda sa pagpahuway sa katawhan.

Ang inspection team nga gipadala ni Villarete pagsusi sa reklamo ni Quisumbing nagagikan sa Bureau of Fire Protection, Liquor Licensing Commission, Treasurers’ Office, Office of the Building Officials ug uban pa nga opisina.

Nasayran usab nga ang maong duha ka balay-patigayon namaligya og ilimnon nga makahubog nga walay permit. Basi sa balaud kun ang usa ka balay-patigayon mobaligya ug magpainum og bino o kaha beer sa ilang customer kinahanglan sila nga mokuha og Permit to Sell and Serve.

Gawas nga wala sila’y permit pagbaligya, mi-operate pa gayud sila hangtud na sa kaadlawon. (BANAT NEWS)