Korean consul nangayo og pasaylo tungod sa gibuhat sa mga Koreano sa GMA Crew

CEBU, Philippines - Ang Korean Consul nangayo og pasaylo sa reporter sa GMA-7 Cebu sa nahitabong pag-ilog sa camera sa news crew didto sa buhatan sa kapolisan sa dakbayan sa Lapulapu kapin usa ka semana na ang milabay.

Sa pakighinabi sa Banat  News ni GMA-7 Cebu reporter Bexmae Jumao-as ug Leofil Labastida ang Cameramen kini mikumpirmar nga gihikay na sa ilang ulohang buhatan ang kasong ipasaka batok sa inahan ni Hyun Chul Whang ug mga kauban niining Koreano nga miharas sa GMA-7 crew.

Si Cel Amores usa sa dakong opisyal sa GMA-7 Manila hugot gyud nga mopasaka sa kaso batok sa mga Koreano tungod sa nahitabo. Matud pa ni Jumao-as, si Atty. Agusto "Gas" Go ang Honorary Korean Consul nangayo og pasaylo sa gibuhat  sa mga Koreano.

Si Lapulapu City Police Office Director Sr. Supt. Rey Lyndon Lawas miingon nga motabang sila kung ipasaka sa GMA-7 ang kaso  batok ni Hyun.

 Kahinumduman nga duha ka semana na ang nakalabay miabot ang ginikanan ni Hyun Chul Whang sa Lapulapu City Police Office headquarters ug nasuko nga nagkuha og footage ang GMA News crew kanila. Matud pa sa newscrew gigukod sila ug giilog ilang camera ug mimandong ipapapas ang footage.

Si Hyun maoy suspek sa pagpatay kang Whenvy Jean Noel sulod sa usa ka motel. Si Hyun gituohang misuway usab og hikog apan naabtan ug nadala sa tambalanan. (BANAT NEWS)