Toledo Mangrove River Park gilusad

CEBU, Philippines - Ang Global Business Power Corporation (GBPC) kauban ang Toledo City Government milusad sa Phase 1 sa balor og  P9 milyones  nga Toledo Mangrove River Park project  didto sa Shoxon Resort sa Brgy. Ibo, Toledo City  sa miaging  Huwebes.

Ang maong proyekto  usa  sa mga  labing  maanindot  nga suroyanan  unya sa  mga  turista  sa Toledo  nga  naglangkob  usab  sa  Malubog Lake, Cantabaco ug Hinulawan River.

Ang Toledo Mangrove River Park   naglaraw  nga  mougmad  sa  3.2 ektaryas  kabakhawan sa  maong dakbayan nga  alang  sa  kaayohan  sa natad  sa turismo.

Kining maong proyekto  gigahinan  og P4.5 milyones alang  sa Phase 1 ug laing P4.5M sa Phase 2.

Ang  sapa  nga  giadornohan  sa  mga bakhaw may  gitas-on    nga  mokabat   2.5 kilometro nga naglakip sa barangay Ibo, Tubod ug Poblacion, kansang  mga  bakhaw  nga  nagkadaiya  ang klase makita  sa duha  ka ektaryang  luna,  samtang  may 1.2 ektaryas  usab  nga  nabakante na.

Si Toledo City Mayor Aurelio Espinosa mapasalamaton  kaayo  sa GBPC sa kanunay’ng  suporta  niini dili  lang  sa negosyo  nga  pang-industriya    kundi bisan  pa  sa proyekto  alang sa turismo  sa Toledo.

Mitambong  usab  sa seremonyas  sa paglusad  sa maong  proyekto sila si Toledo City Vice Mayor Arlene “Dydee” Zambo, GBPC vice president for Toledo Operations Leah Diaz, DENR representative Fedencio Carreon, mga membro  Sangguniang  Panglungsod sa dakbayan  sa Toledo  ug mga opisyal  sa  duha ka  mga  barangay  nga mao sila  si    Tubod barangay Captain Jeffrey Lebumfacil ug Brgy. Capt. Silvestre Cambarijan sa Ibo. (BANAT NEWS)