Sunog 25 ka bay ugdaw 3 angol

CEBU, Philippines - Mikabat  sa 25 ka balay  ang  naugdaw  samtang  tulo  ka tawo  ang  naangol  sa sunog  nga miigo  sa sitio Sambag 2, barangay Guadalupe, dakbayan  sa Sugbo  kagahapon  pasado alas 2:00 sa hapon.

Ang mga angol mao   sila  si  Camilo Muaña, 82, Evangeline Larisa, 44 ug Matt Caballes diin pulos  mga  molupyo  sa maong  lugar.

Si SFO1 Lowel Opolentisima   sa Cebu  City Fire Department mibutyag sa Banat News  nga ang kayo nagsugod sa atop sa balay ni Josebel Roxas ug ila  kining  nakontrolar sulod  sa 20 minutos.

Matud pa ni Opolentisima nga duha ka anggulo ang ilang gisubay karon nga kun di posporo  nga giduwaan  sa  mga bata, faulty electrical  wiring  ang  posibling hinungdan sa maong sunog.

Kasamtangang namahuway sa sports complex sa maong lugar ang mga nasunugan.

Si Kapitan Michael Gacasan mibutyag nga ipadeklarar  nila nga  ubos  sa state of calamity ang ilang lugar aron makagamit sila  sa calamity  fund  alang sa mga nabiktima sa sunog.

Padayon  pa  nga gisusi  sa  mga tinugyanan  sa bombero  ang  maong  hitabo. (BANAT NEWS)