Carnappers sa Talisay nadakpan

CEBU, Philippines - Duha ka suspetsadong carnappers kinsa midagit sa usa ka traysikol niadtong Martes sa kaadlawon diha sa UP Lot, barangay Lawaan I, dakbayan sa Talisay ang nasikop sa gipahigayong follow-up operation sa mga polis niadtong Miyerkules. Si Jimbo Serano alyas “Gong-gong”, 28, residente sa nahisgutang dapit nasikop sa mga polis diha sa may merkado sa barangay Poblacion, lungsod sa Barili.

Samtang ang giingong kauban niining si Noli Gomez, 35, taga UP Lot usab ang nasikop usab duol sa balay niini.

Ang biktima mao ang drayber sa traysikol nga si Carlito Bendanillo, 52, taga UP Lot. Giabangan lang kini ni Bendanillo ug anha kini igarahe sa ilang balay. Ang mga nakasikop sa suspetsado mao sila si SPO1 Rolando Bastida, PO3 Benedicto Lasque, PO3 Ferdinand Pablo, PO2 Leandro Azarcon, PO1 Erwin Denila ug PO1 Daniel Cabatas.

Si Lasque nga nahinabi sa Banat News kagahapon mibutyag nga dunay nakakita nga silingan sa mga suspetsado nga miguroy sa traysikol gikan sa balay ni Bendanillo ug diha na sa unahan sa balay gipa-andar aron dili mabatian.

Ang sidecar sa maong traysikol gibaligya sa mga suspetsado og P1,400 diha sa usa ka junkshop sa barangay Mabolo, dakbayan sa Sugbo.

Samtang ang motorsiklo gibilin sa mga suspetsado sa usa ka shop sa McArthur Boulevard, dakbayan sa Sugbo aron ipaayo tungod kay giingong nadaot ang “crank” niini. Apan ang tag-iya sa maong motor shop nahibulong tungod kay gibiyaan kini sa naghatud ug wala na balika. Na-recover hinuon sa kapolisan ang maong motor.

Gibutyag ni Lasque nga si Serano maoy suspetsado usab sa pagdagit sa motorsiklo ni PO2 Azarcon nga giparada diha sa likod sa city hall sa barangay Mohon sayo niining tuiga.

Si Serano nadakpan kaniadto tungod sa giingong pagpanghagis niini sa iyang paryente.  (BANAT NEWS)