CCMC giawhag nga palambuon pa gyud ang ilang serbisyo
CEBU, Philippines - Si Mayor Michael Rama mipahinumdom ni Cebu City Medical Center (CCMC) director Gloria Duterte nga kinahanglang wala g’yuy pasyente nga balibaran ilabi na kun naglambigit kini og emerhensya.
Ang awhag ni Rama iyang gihimo human nga si Dra. Duterte maoy napili nga “Outstanding Department Head of the Year†unya ang CCMC nga iyang gidumala mao ‘say napili nga “Outstanding Department†sa City Hall.
Sa miaging tuig, ang CCMC mao gihapon ang giila nga “Outstanding Department.â€
Matud ni Rama nga wala gyud siya masayop sa pagtudlo ni Duterte nga maoy modumala sa CCMC kay ubos sa iyang pagdumala milambo pag-ayo ang serbisyo sa CCMC.
Si Rama nagtoo nga karon nga gidugangan ang budget sa CCMC ngadto na sa P364 milyones, molambo pa og maayo ang serbisyo publiko sa maong tambalanan.
Ang konseho sa dakbayan sa Sugbo miaprobar ‘sab nga ang pagpamalit og tambal ug medisina alang sa CCMC gahinan og P80 milyones.
Si Duterte miingon nga tungod sa maong budget malantawan niya nga mosamot nga maserbisyohan sa CCMC ang mga kabus nga modangop kanila.
Gusto ni Duterte nga ang P50,000 nga gihatag kanila nga ganti, ila na usab nga gastohan pagpalambo sa CCMC. Matud ni Duterte nga iyang ipa-renovate ang medicare ug employees ward, apil ang laboratory section. (BANAT NEWS)
- Latest
