Pagbunok sa ulan nagbunga og problema sa LP rally

CEBU, Philippines - Nagkaproblema sa dagan sa trapiko atol sa gipahigayong proclamation rally sa Liberal Party diha sa barangay Tabunok, dakbayan sa Talisay.         

Ang maong proclamation rally gikatakda untang ipahigayon diha sa bakanteng luna atbang sa city hall sa barangay Lawaan II apan tungod sa dili maayong tempo ug sige ang bunok sa uwan gibalhin ang venue niini diha sa Tabunok Sports Complex.         

Si Supt.  Lim, officer-in-charge sa Talisay City Police Station mibutyag sa Banat News nga naatol sa peak hours ang rally diha sa Tabunok hinungdan nga na-traffic og maayo.         

Ang Tabunok usa kini ka bottle neck sa trapiko ug gani bisan og walay mga kalihukan maghuot gyud ang dagan sa trapiko diha sa lugar ilabi na sa mga alas 5:00 sa hapon hangtud na kini sa alas 7:00 sa gabii.  Si Almond Keith Dela Peña, hepe sa traffic enforcers sa siyudad mibutyag kini sa Banat News nga naguba ang ilang unang plano tungod sa kinalit nga pagbalhin sa venue.         

Gibana-bana nga 7,000 ang mga mitambong sa rally sa sulod sa complex nga gibantayan sa kapin 200 ka mga polis.

Mi-inspeksyon sa seguridad sila si Chief Supt.  Marcelo Garbo Jr. ug Sr. Supt. Patrocinio Comendador.          

Sa laing bahin usab, ang tanang mga opisyal ug kandidato sa lokal nga distrito sa probinsiya sa Sugbo nga kaalyado sa LP ang mitambong sa rally.         

Si Presidente Benigno Simeon Aquino III miabot uban sa mga kandidato sa senatorial slates nga gilangkuban sa iyang pag-umangkon nga si Bam Aquino, Jamby Madrigal, Grace Poe, Riza Honteveros.

Daghang mga senatorial candidates ang wala diha sa rally sama nila ni Loren Legarda; Sony Angara; Gwen Pimentel; ug Cynthia Villar. Girepresentahan hinuon sila sa ilang mga kabanay. (BANAT NEWS)