CIB gireklamong ilegal nga mi-search og balay

CEBU, Philippines - Usa ka pamilya ang mireklamo nga illegal nga gironda sa mga sakop sa City Intelligence Branch (CIB) ang ilang balay bisan walay search warrant pasado alas-8 sa miaging gabii diha sa sitio Kawayan Banawa, barangay Guadalupe sa siyudad sa Sugbo. Si Rosana Labra, ang asawa sa gidakop nga si Lodgerio mipabuhagay sa iyang kahiubos ngadto sa kapolisan nga mironda sa ilang panimalay tungod sa pagguba sa  lock sa pultahan.

Matud pa giukay sa mga polis ang ilang mga butang aron mangita  og mga ebidensya apan  wala silay nakuha. Matud pa niya bisan ang iyang kamanghurang anak nalisang og maayo sa gibuhat sa mga polis nga nagbitbit og armas.

Matud pa ni Labra dihang ilang gipangitaan og search warrant ang mga polis wala silay napakitang dokumento apan sila pa hinuoy gibaharan ug gihudlat.

Ang hepe sa  CIB Chief Insp. Romeo Santander mibutyag sa Banat News nga lehitimong operasyon ang  ilang gihimo  tungod kay kini “bet-buy” o nipusta  ang usa sa iyang mga sakop kang Labra.

Matud pa ni Santander nga ang ilang subject nga si Lodgerio gikatahong miangkon nga siya nalambigit sa illegal nga sugal. (BANAT NEWS)