‘Hitman’ patay; ‘druglord’ dakpan

CEBU, Philippines - Usa patay ug unom ang nasikop apil niini lima ka mga menor de edad sa gipahigayong operasyon sa mga operatiba sa Provincial Intelligence Branch sa miaging adlaw sa udto sa Sitio Navarra, Barangay Canhabagat, Medellin.

Napusilan sa operatiba si Joven Senining, taga siyudad sa Sugbo ug giingong gun-for-hire. Naigo kini sa walang ilok dihang giingong mibunot sa .45 nga pistola niini.

Daling gidala si Senining sa Bogo Provincial Hospital diin gideklarar kini nga dead on arrival. Nakuha gikan niya ang pistola, usa ka magazine ug pipila ka bala sa maong armas.

Ang mga nasikop giila nga sila si William Mercader, 35, maoy subject sa operasyon, ug lima ka mga menor de edad nga nagpangidaron og 15 ngadto sa 17 –anyos nga maoy gigamit ni Mercader nga “look outs” ug tig-repack og shabu.

Matud sa operatiba nga adunay tulo ka mga kauban si Senining nga nakadagan apil na ang ginganlan og “Baki.”

Na-recover sa operatiba mao ang 82 ka gagmay nga pakete;  duha ka medium packs;  ug usa ka dako nga pakete sa shabu nga mokabat sa P65,500;  KG9 submachine pistol ug usa ka magazine niini nga adunay 21 ka bala sa .9mm; usa ka High Cap Nighthawk .45 pistol ug magazine nga adunay 10 ka bala;  usa ka High Cap Sam .45 pistol ug magazine nga adunay 11 ka bala;  usa ka Black Widow .22 revolver nga adunay upat ka bala ug  laing unom ka bala sa .45 pistol, mga cellphone, ug nagkadaiyang drug paraphernalia.

Ang mga illegal drugs gidala na kini sa Philippine National Police Crime Laboratory-7 sa Camp Sotero Cabahug, Cebu City alang sa chemical analysis.

Si Mercader temporaryong natanggong sa karsel sa Consolacion Police Station ug mag-atubang og kasong Section 5 sa RA 9165 or Dangerous Drugs Act of 2002 ug Illegal Possession of Firearms.

Ang mga menor de edad dad-on ngadto sa Department of Social Welfare and Development.

Sumala pa sa kapolisan  nakadawat sila og report bahin sa mga armadong mga tawo nga nagpadagan og illegal nga drugas sa maong dapit hinungdan sa pag-mando ni Sr. Supt. Patrocinio Comendador, director sa CPPO  sa pag-pahigayon og surveillance sa mga suspek.

“Duna may reports nga kini si Senining nanion recently og KG9 pistol sa barangay tanod. Naka-terrorized ni sila sa mga residente ngadto,” matud ni Comendador. Dihang nag-positibo ang ‘test buy’ sa mga operatiba mga duha ka adlaw sa wala pa ang operasyon adtong alas 4:30 sa hapon gi-andam dayon ang plano kun unsaon siya pagsikop.

Si Mercader nasikop human niini mahatag ang usa ka medium nga pakete sa shabu bugti sa P1,000 nga marked money gikan sa poseur buyer.

Apan dihang nakabantay ang tulo ka armado dali silang misibat apan nanigurado si Senining sa pagbunot sa iyang pistola hinungdan nga kini gibirahan sa mga polis.

Matud ni Supt. Rodolfo Albotra, hepe sa PIB, si Mercader anaa sa ilang listahan ug numero uno kini sa listahan sa Medellin isip noted nga drug pusher.

Si Mercader giingong level one drug pusher nga makahurot og gibana-bana usa ka kilo nga shabu kada semana.

Sa iyang bahin, si Mercader miangkon nga iyaha ang mga drugas apan mi-deny nga apil siya sa grupong guns-for-hire.

Si Mercader mipasangil usab kang Senining nga maoy responsible sa pagpusil patay kang Rodulfo Misa, 41, taga- Barangay Malbago, Daanbantayan ug pagkaangol ni Marvin Ostia, 24, sa miaging buwan. Ang duha giingong gi-kidnap sa Barangay Tindog ug gidala sa Barangay Caputatan Sur diin kini pamusila.

Ang kapulisan nag-imbestigar na karon sa laing tulo nga mi-eskapo. Nakig-alayon na usab sila sa ubang police stations aron pagsuta kung aduna bay pending nga kaso si Mercader. (BANAT NEWS)