Publiko gipasidan-an bahin trabahong gitanyag pinaagi sa e-mail
CEBU, Philippines - Mipasidaan ang mga opisyal sa Philippine Overseas Employment Administration (POEA) sa publiko batok sa mga gitanyag nga trabaho sa Estados Unidos pinaagi sa electronic mail o e-mail.
Matud pa ni POEA Administrator Hans Cacdac, nga nakadawat sila og impormasyon gikan kang Luzviminda Padilla, Philippine Labor Attaché to Washington D. C., kalabot sa maong pagpangilad.
Giingong nasakpan ang operasyon sa sindikato sa dihang nangayo og tabang sa Philippine Overseas Labor Office (POLO) sa Washington ang usa ka Pinoy didto aron pagklaro sa gitanyag nga trabaho kaniya pinaagi sa e-mail nga himoon siyang yaya.
Bugti sa maong trabaho isip yaya sa New Jersey, USA, gipangayoan siya og kantidad alang sa pagproseso sa aplikasyon. Tungod kay nagdungayop nga makatrabaho sa U.S ang giingon nga nasud diin tua ang “greener pasture†mipadala dayon ang maong Pinoy og US$276.99 pinaagi sa money transfer sa usa ka Qunesha Clewis nga nahimutang sa San Bernardino, California.
Apan human mipahigayon og imbestigasyon ang POLO-Washington, migawas nga dili tinuod ang gihatag nga ngalan ug bisan ang trabahong gitanyag sa e-mail.
Busa mitambag si Cacdac sa publiko nga ipahibalo dayon sa POEA ug sa hingtungdang ahensiya ang mga gitanyag nga trabaho alang sa gawas sa nasud nga ilang madawat pinaagi sa e-mail aron dili sila mabiktima sa mga mangingilad. (BANAT NEWS)
- Latest
