Cañete nagpaabot Cortes makigsulti niya

CEBU, Philippines - Abli si Dr.  Paulus Cañete, president sa Mandaue City College (MCC) sa Basak  campus alang sa laing  mga sabot-sabot  tali  ni  Mayor Jonas Cortes.

Matud pa niya nga  bisan kun dili ilhon ang  gidumala niyang tulunghaan sa kagamhanan   apan igo na kaayo alang kanila nga tahuron lamang    ang maong  eskuylahan.

Gipaabot ni Dr.  Cañete nga mabalhin sila gikan sa kanhi nila nahimutangan sa barangay Tipolo  ngadto na sa dako nga lugar sa dalan H. Abellana sa barangay Basak sa maong dakbayan tungod kay namatikdan  niya nga nagkadaghan ang ilang mga tinun-an matag bukas  sa  klase.

Dugang pa niya nga mokabat sa 1,000 na kapin ka mga tinun-an ang nagtungha sa gidumala niyang tulunghaan karon ug kapin sa 200 usab nila ka mga tinun-an ang anaa karon sa  on-the-job  training.

Si Cañete miingon nga   murag  kataw-anan kaayong palandungon  nga adunay nagtinguha sa pagpasira sa gidumala niyang  eskuylahan nga unta ang ilang gihimo mao man lang ang pagtabang sa pag-umol sa mga tinun-an nga mahimo usab silang propesyonal ug mahimong mapuslanon sa katilingban.

Hinuon si Dr.  Cañete nagdumili sa pagkomentaryo sa mga kaso karon sa ilang tulunghaan sanglit kini anaa pa sa korte ug nagpaabot pa sila nga maresulbar.

 Gitataw niya nga bisan kun wala’y gitabang ang kagamhanan sa dakbayan sa gidumala niyang tulunghaan apan sa gihapon maoy iyang gikauban ang 20 ka mga professor nga seryuso usab nga motabang sa mga tinun-an nga makahuman sa ilang pagtungha alang sa paghatag kanila og maayong kaugmaon.

Sa nasayran, ang kagamhanan sa dakbayan kasamtangan  nagdumala sa MCC sa sulod sa compound sa Mandaue City Cultural and Sports Complex sa sitio Tribunal sa barangay Centro ug kapin usab sa 1,000 ka mga tinun-an ang nagtungha niini. (BANAT NEWS)