Giluba makasiyam patay

CEBU, Philippines - Patay na nga napalgan  ang usa ka 51-anyos nga byuda  human matusak  ang  lawas  niini  sa siyam  ka  dinunggaban nga nagbuy-od sa dalan dili layo sa iyang balay  didto sa barangay Cayam lungsod sa San Remegio kagahapon sa alas 4:00 pasado sa kaadlawon.

Apan mga alas 5:00 na sa sayong buntag napalgan sa mga paryente ang patay’ng lawas niini  tupad ang iyang bag ug mga baligya.

Ang biktima mao si Editha Robles Sinadjan, 51, byuda, nagpuyo sa maong lugar ug manindahay  sa  mga fiesta,  discohan, ug   sa  mga  tabo sa maong lugar.    

Samtang wala pay natumbok nga kriminal  sa paghimo niining balita.

Si SPO1 Joejohnnesky Ynot, imbistigador sa San Remegio Police   Station  mibutyag sa Banat News  nga   ang  biktima  gikan  pa nga naninda og mga ilimnon ug pagkaon sa discohan  sa Sitio Tamban, silingang  lugar  sa  iyang  pinuy-anan.

Kagahapon  sa  alas 4:00 sa kaadlawon nanghipos kini kay  dayon  na  nga mipauli  sa iyang  balay uban   sa mga silingan  niyang   manindahay  usab.

Apan   dihang mitipas  sa laing  dan  ang  iyang  kauban, nag-inusara  nalang  kini  nga  misubay    sa iyang  agianan  paingon  sa iyang  balay. Apan nianang pagka- alas 5:00 sa buntag, nakurat  nalang  ang  iyang  mga paryente  dihang nakit-an niini   ang biktima nga nagbuy-od daplin  sa dalan  nga  naglunang  sa kaugalingon  niining  dugo.

Dihang  gisusi  nila  ang  lawas,  nasuta  nga  may  siyam  kini  ka  samad  dinunggaban  lakip  ang  sa iyang liog,  nga  wala  nay  kinabuhi.

Gisuwayan pa unta kini og dala sa mga mirespondi nga polis  ngadto  sa tambalanan apan gideklarar kini sa doctor nga patay na.

Gituohan sa kapolisan nga gi-atangan nang daan o ba kaha gisundan ang biktima ug pag-abot sa maong lugar didto na kini patya.

Gisalikway sa kapolisan ang pagduda nga tulis ang motibo sanglit kompleto pa man   ang  iyang  mga  alahas ug kuwarta  nga  halin  paninda nga gisulod  sa iyang  bag.

Padayon  pa  nga gisusi   sa kapolisan ang motibo sa maong  krimen pinaagi sa pagpanghipos og dugang kasayoran  bahin  sa pagkatawo sa biktima   gikan sa mga silingan ug kabanay niini pagsuta kun wala ba kini gikabangi.

Samtang  padayon  pa  usab  ang  kapolisan  sa pagpaniid   kinsay  posibling mipatay  sa biktima  sa ilang  lugar. (/WC)(BANAT NEWS)