NAVFORCEN may bag-ong komander

CEBU, Philippines - Bag-o na ang Commander sa Naval Forces Central o NAVFORCEN  nga si Commodore Reynaldo Yuma kinsa   usa ka PMA Class 82 graduate   nga  gikan sa Naval Base sa lalawigan sa Cavite .

Siya  maoy  mihulip  ni Commodore Leopoldo Alano nga karon atua  na idestino sa Sangley Point sa Cavite isip commander sa Naval base nga gigikanan ni  Yuma.

Personal nga gitugyan ni Navy Vice Admiral Edgardo Tamayo ang katungdanan ngadto ni  Yuma ug  Alano dala ang panghinaut sa mga kalamboan sa pagmintinar nila sa kalinaw sulod sa ilang teritoryo sa nasud.

Matud pa ni Vice Admiral Tamayo nga kinahanglang alisto ang mga sakop sa Philippine Navy sa bisan unsang kalihukan nga maghulga sa seguridad sa nasud ug sa mga buot moilog sa atong teritoryo sama sa  nahitabo sa West Philippine Sea ug ang barkong iggugubat nga nasangad didto sa Tubataha reef sa Palawan.

Samtang si  Alano mapasalamaton sa kooperasyon nga gihatag sa iyang mga sakop ilabi na sa panahon sa ilang paghatag og mga hinabang ngadto sa mga biktima sa bagyo didto sa Mindanao diin ang NAVFORCEN maoy usa sa miabag sa goberno sa pagpang-apod-apod sa mga relief goods ngadto sa katawhan.

Si  Yuma usab sa iyang bahin misaad nga padayon ang ilang kooperasyon nga ihatag ngadto sa mga nagkinahanglan sa serbisyo sa NAVFORCEN ilabi  na  sa panahon sa kalamidad ug sa pagbantay sa seguridad sa nasud.  (BANAT NEWS)