Babaye nadasmagan sa motorsiklo patay

CEBU, Philippines - Namatay ang usa ka babaye kinsa gituohang nalisoan sa maayong pangisip  human madasmagi  sa  motorsiklo  didto sa barangay Gairan, siyudad sa Bogo sa miaging Huwebes sa alas 3:55 sa hapon.

Ang biktima gihulagway  sa kapolisan nga nagpangidaron  og kapin  sa 60, kansang  senina kolor blue ug dauton ang pamayhon.

Samtang ang nakadasmag niini mao si Benjamen Dignos, 57, minyo,   nga  taga Sitio Simbawan barangay Nailon, siyudad  sa Bogo. Si PO2 Jerry Dela Cruz, traffic investigator sa Bogo City Police mibutyag  sa Banat News   nga si Dignos nagpadagan   sa iyang motorsiklo gikan sa barangay Nailon paingon sa barangay Carbon, Bogo  dihang pag-abot sa maong lugar mihana  kini  og  labang,  busa  milihay  siya  apan  miatras  usab kalit  busa  iyang  nadasmagan.

Gituohan  nga  gumikan  sa pagkalamba  sa biktima  sa   karsada napantok  ang  ulo  niini  nga maoy  hinungdan  sa iyang  kamatayon.

Gihatud  dayon  ni  Dignos  ang  biktima  ngadto  sa Verallo District Hospital apan gideklarar nga Dead on Arrival  sa mga doctor.

Samtang ang drayber sa motorsiklo boluntaryo usab nga mitahan sa iyang kaugalingon sa mga polis nga mirespondi  aron atubangon ang posibling sumbong nga ipasaka batuk kaniya. (/WC) (BANAT NEWS)